P4.5B budget sa probinsiya aprobado na sa PB

CEBU, Philippines — Giaprobahan kagahapon sa hunta probinsiyal ang giduso nga P4.5 bilyones nga budget alang sa tuig 2018 sa probinsiya sa Sugbo.

Matud ni Celestino “Tining” Martinez, chairman sa committee on budget and appropriation sa provincial board wala nila gipaubsan ang pundo ug gani adunay pipila ka buhatan nga gusto niyang mapadak-an pa ang pundo alang sa mga proyekto ug programa nga ipatuman niini.

Ang maong mga buhatan naglakip sa Provincial Planning and Development Office (PPDO) nga mohatag og assistance sa kalungsuran kalabot sa pagplano nga molambo ang ilang mga lungsod ug dakbayan.

Hinuon matud ni Martinez nga kun ugaling makulangan og pundo ang mga buhatan sa Kapitolyo mamahimo ra kining mangayo og supplemental budget sunod tuig.

Ang P4.5 bilyones nga budget alang sa sunod tuig misaka kini og P879 milyones o 24.28% itandi sa P3.6 bilyones niining tuiga.

Ang labing dako nga gigahinan mao ang sa hospital operations sa 16 ka provincial ug district hospitals diin P1.1 bilyones ang gigahin.

Gisundan kini sa buhatan sa gobernador nga P745 milyones ang pundo alang sa tuig 2018.  (BANAT NEWS)