Lapu-Lapu nangandam na sa Kalagkalag

CEBU, Philippines — Mga polis sa Lapu-Lapu City Police Office (LLCPO) ug ang buhatan sa City Traffic Management System (CTMS) ang maghiusa sa kahapsay ug kalinaw sa pagsaulog sa Adlaw sa mga Kalag ug Todos Los Santos sa Nobiyembre 1 ug 2 niining tuiga.

Si Senior Superintendent  Rommel Cabagnot, direktor sa  LLCPO miluwat na og kamandoan sa lima ka mga presinto sa pagdestino og mga polis sa mga sam-ang sa maong adlaw nga gipaabot nga hugopan sa daghang mga tawo.

Ang mga sam-ang pahugtan ang seguridad nga gidumala sa simbahang Katoliko mao ang sam-ang sa Sitio Carajay sa Barangay Gun-ob sa maong dakbayan.

Higpit usab nga bantayan ang cementerio municipal sa mao gihapong lugar. Gamiton usab ang mga barangay tanod sa pagbantay.

Gidili ang pagdala og ilimnong makahubog ug mga mahait nga hinagiban sa  paglikay sa dautang panghitabo.

Ang CTMS gipangulohan ni Mario Napuli ang modestino usa og mga traffic enforcer sa mga dalan nga nagpaingon sa pagsulod sa sementeryo aron dili magkaproblema sa traffic. (BANAT NEWS)