PNP-SAF nang-recruit og mga bag-ong sakop

CEBU, Philippines — Nang-recruit ang Philippine National Police–Special Action Force og mamahimo nilang bag-ong sakop.

Matud ni Senior Inspector San Roget King Ho nga tinguha nila nga makakuha og 4,000 ka bag-ong sakop subay sa kamanduan sa Malacañang sa tanang units sa kapolisan sa pag-recruit og dugang mga sakop.

Ang kamanduan giluwatan human nakita ni Presidente Rodrigo Duterte nga gamay o nagkuwang ang kasamtangang mga sakop sa PNP-SAF.

Ang grupo ni Ho ang anaa sa Camp Sergio Osmeña diin nahimutang ang Police Regional Office-7 aron mangunay sa pagtan-aw sa recruitment process.

Dugang ni Ho nga abli ang ilang opisina sa mga aplikante nga nag-edad og 21 hangtud 30 kinsa adunay gitas-on nga 5’4” alang sa mga lalaki ug 5’2” alang sa mga babaye. Kinahanglan usab nga ang aplikante pasado sa eksaminasyon sa National Police Commission, Civil Service Commission ug uban pa.  

Ang mga madawat sa pasiunang screening mopaubos sa dugang pa nga exams nga mosukod sa ilang katakus lakip niini ang fitness, neurological ug medical tests sa dili pa sila ipadala ngadto sa Camp Bagong Diwa aron sa pagsugod sa ilang training.

Ang PNP-SAF usa ka special force nga gibansay alang sa mga kritikal nga operasyon sama sa pagpakigbatok sa terorismo, rebelyon ug insurhensiya ug pagsikop sa giisip nga mga high-value targets. (BANAT NEWS)