Tunghaan una maka-monitor sa frat

CEBU, Philippines — Nunot sa pagkamatay sa usa ka law student sa University of Santo Tomas tungod sa hazing, giawhag ni Cebu City Police Office Director Joel Doria nga motabang sa pag-monitor ang kadagkoan sa tunghaan.

Matud ni Doria nga mahimong isumbong dayon sa kapolisan ang susamang insidente aron malikayan ang hazing sa mga fraternities sa mga estudyante.

Giklaro ni Doria nga ang tunghaan gyud ang may dakong gahum nga mapugngan ang hazing sanglit ang fraternities naa sa eskwelahan samtang ang mga polis naa sa gawas.

Giingong nananghid ang 22-anyos nga si Horacio Tomas Castillo III sa iyang ginikanan nga motambong sa "welcome ceremony" sa fraternity nga Aegis Juris diin bag-o siya nga sakop apan wala na kini nahiuli.

Napalgan na lang daplin sa dalan nga napuno na sa bun-og ug paso sa kandila ug sigarilyo ang lawas niini niadtong Domingo sa buntag ug dali nga gidala sa tambalanan diin gideklarar kini nga patay na. Gituohang namatay kini sa hazing tungod sa mga naangkong mga bun-og sa lawas.

Nasuta nga wala nasayud ang kadagkoan sa tunghaan sa maong welcome ceremony. (BANAT NEWS)