Armado, problemado nabangga patay

CEBU, Philippines - Usa ang patay sa panagbangga sa usa ka sakyanan ug motorsiklo sa national highway sa Kabulihan, Ilihan, Dakbayan sa Toledo.

Giila ang nakalas nga si Pedro Cerojano Atuel, 40, taga Paril, Dakbayan sa Sugbo, kinsa nagmaneho og motorsiklo samtang ang nagmaneho sa SUV mao si Jacob Isaac Bahena Ortiz, 33, taga Poblacion, Dakbayan sa Toledo.

Base sa imbestigasyon sa Toledo City Traffic Section nga ang biktima gikan sa Sangi, Toledo ug paingon unta sa Lutopan dihang ni-overshoot sa center lane hinungdan nga maayong pagkabangga sa SUV.

Daling gidala sa Toledo City Hospital ang biktima kinsa nakaangkon og daghang pangos ug samad sa nagkadaiyang parte sa lawas.

Apan gideklarar ni Dr. Vera Yanong, attending physician, nga patay na ang biktima.

Nitahan ang drayber sa SUV sa kapolisan samtang narekober ang usa ka .9mm nga kalibre sa armas nga adunay walo ka bala gikan sa biktima nga padayon nga gisubay sa mga awtoridad kun nganong armado kini.

Samtang nabuak ang ulo sa tawo nga wala nagsul-ob og helmet dihang ang motorsiklo nga iyang giluwanan ang kalit lang nabangga sa poste sa daplin sa dalan sa Sitio Timpolok, Babag, Dakbayan sa Lapu-Lapu alas 3 pasado sa niaging kadlawon.

Si Police Officer 1 Milven Iyas nga maoy traffic field investigator sa sa Lapu-Lapu City Police Office (LLCPO) niingon nga nagbaton og personal nga problema ang biktima sa ilang panimalay.

Kini ang hinungdan nga nilakaw kini ug nakig-inom sa iyang mga higala sa Barangay Kalawisan ug kadlawon na nga nipauli sa ilang panimalay.

Dugang ni Iyas nga base sa ilang nakitang kahimtang sa biktima ilang gituohan nga kusog kining nakapadagan sa iyang motorsiklo ug gumikan sa kangitngit sa maong dapit, wala na makita niini ang poste hinungdan nga nabangga.

Gumikan sa kakusog sa impact sa maong pagkabangga, ilang gituohan nga nabunal ang ulo niini ngadto sa poste nga nakaingon sa pagkabuak ug namatay. Raymond D. Abarcas ug Romeo T. Limpangog (BANAT NEWS)