Usa gipusil patay sa disko

CEBU, Philippines – Patay ang usa ka 20-anyos human kini gipusil sa ulo sa usa ka 19-anyos atol sa kasaulogan sa pista didto sa Barangay Yati, Liloan niadtong Sabado sa gabii.

Gideklarang patay ni Dr. Israel Sanchez sa Liloan Municipal Health Office ang biktima nga si Royet Membreve, 20,  taga Sitio Mahayahay Uno, Barangay Tayud human makaangkon og samad pinusilan sa ulo.

Naigo sab sa iyang bukton ang laing 23-anyos nga biktima nga si Nico Cabahug Apas, residente sa Purok Salwag, Sitio Kalubuhan, Barangay Yati kinsa anaa na karun sa luwas nga kahimtang.

Samtang ang gitumbok nga suspetsado mao si Francis Xavier Pepito Bontol, 19, residente ra sab sa maong barangay.

Asoy pa sa hepe sa Liloan Police station nga si Police Senior Supt. Melbert Glade C. Esguerra ngadto sa Banat News nga wala’y nakadungog sa pagbuto sa pusil tungod sa kakusog sa tukar sa disko sulod sa basketball court sa barangay.

Natingala na lang ang kadaghanan nga duna nay nahagba, matud pa sa maong hepe. Sa dihang gipangutana na sa kapolisan ang biktima nga si Apas nitug-an kini nga gipusil kini sa ginganlan og “Pantet.”

Apan sa dihang gisubay na sa kapolisan ang maong gipasanginlang lalaki, didto nasuta ang tinuod niyang pangalan ug sa dihang gipakita sab ang hulagway niini ngadto kang Apas, positibo kining giila sa maong biktima matud pa ni Esguerra.

Mibutyag ang maong hepe nga sa dihang gironda sa kapolisan ang panimalay ni Bontol, wala na kini ngadto hinungdan nga dali kining gipahigayonan ug hot pursuit operation.

Sumala pa ni Esguerra si Apas wala makaila sa namatay nga si Membreve nga gituohang maoy target ni Bontol.

Apan gibutyag sa maong hepe nga sa dihang gidala sa ospital si Apas didto ilaha kining nasakpang adunay duha ka mga paketeng shabu sulod sa tuong bulsa sa iyang purol.

Duha ka mga motibo ang gitutokan sa kapolisan, una mao ang panagbangi sa suspetsado ug sa biktima nga namatay ug ikaduha mao ang anggulo may labot sa droga human makuhai og shabu si Apas. -/EIM (BANAT NEWS)