Hepe sa Tuburan District Hospital nihimakak
CEBU, Philippines - Kusganong gihimakak sa hepe sa Tuburan District Hospital ang report nga adunay pasyente nila nga namatay kay nasayop og inject og tambal ang hospital staff. Si Dr. Esteban Ligaray mibutyag nga wala kini kamatuoran. "No, that (incident) is not true. I am the hospital chief of Tuburan District Hospital. Walay pasyente diri nga namatay kay nasayop og inject," pagklaro pa niya. Apan ang hepe sa Provincial Health Office nga si Dr. Rene Catan gusto mahibaw-an kun unsa kining maong report
Matud ni Catan kagahapon pa usab sila nakadawat sa maong taho ug ila pa kini karon gisusi. Ilaha pang estoryahon ang chief of hospital sa Tuburan bahin niini.
Usa ka taho ang mitumaw nga usa ka pasyente ang giturokan sa nurse og antibiotics apan matud pa namatay ang pasyente. Si Catan nagkanayon nga posibleng misquoted lang ang estorya.
“Misquoted and sayop ang pagka quote siguro so I want Dr. Ligaray to explain it kay apparently ang pasyente, ang anak niya didto sa ward kay nagkasakit man sad ang mother so gihatagan og tambal. I don’t think it’s the mother who died, it’s the daughter. So nagkatagpo-tagpo lang ang story,” matud ni Catan.
Hinuon gusto gyud ni Catan nga maklaro kining maong estoryaha gikan mismo sa chief of hospital sa Tuburan.
Si Ligaray miingon nga miadto na sa ilang tambalanan ang team gikan sa PHO aron pag- imbestigar sa maong panghitabo.
Dugang niya mihatag na usab siya og eksplinasyon ngadto ni Board Member Victoria "Tata" Corominas ang provincial board member sa 3rd district kabahin sa maong isyu.
(BANAT NEWS)
- Latest
