Paglibkas sa truck ban sa SRP gihangop

CEBU, Philippines - Gihangop ni Cebu City Mayor Tomas Osmeña ang lakang nga gihimo sa Siyudad sa Talisay paglibkas sa truck ban sa Cebu South Coastal Road sa South Road Properties.

Kini aron dunay maagian ang mga delivery trucks paingon sa port area sa Cebu City ug sa tugpahanan sa Dakbayan sa Lapu-Lapu.

Human sa walo ka buwan nga implementasyon sa truck ban gilibkas kini human gi-amendahan ang Talisay City Traffic Code.

Si Osmeña miingon ang pagpatuman og truck ban sa Cebu South Coastal Road nagpasabot nga may napugngan nga distribusyon sa industriya sa mga silinganang dapit ug kini  dakong sayop.

 “No, why you put a truck ban on the port?  The life blood of Cebu is trading and you put a truck ban on the port. Remember when Magellan landed here, there’s already a trading here, Cebu is not an agricultural place because this is a natural harbor within Mactan Island providing the shelter,” sigon pa ni Osmeña.

Samtang ang Operations Head sa Cebu City Transportation Office (CCTO) Francisco Ouano miingon kung dunay delivery permit nga tugutan ra ang mga delivery truck nga moagi sa SRP.

Apan aron malikayan ang disgrasya sa dapit magbutang sila og speed gun aron mahibaw-an kun kinsa kadtong mga nag-over speeding ug ila kining paningkamutan nga maimplimentar ug gawas  niini nagplano usab sila nga mobutang og signages. (BANAT NEWS)