Fire safety sa tag-as nga buildings gituki
Napuno ang Ayala Cinema 5 sa mga nangapil sa coordination meeting nga gipahigayon sa Bureau of Fire Protection alang sa mga building administrators, security officers ug building owners aron pagtuki unsaon nga malikayan ang sunog ilabi na sa mga tag-as nga edipisyo sa rehiyon. (Estorya sa pahina 3)—Rowena D. Capistrano
CEBU, Philippines - Nipahigayon ang Bureau of Fire Protection og coordination meeting kagahapon tali sa tanang building administrators, security officers, building owner.
Kini aron tukion ang mga angayang buhaton nga malikayan ang susamang hitabo sa Resort World Manila ug Grenfell Tower sa London diin daghan kinabuhi ang nakalas.
Matud ni Senior Supt. Samuel Tadeo, regional director sa BFP-7, nga tinguha nila nga malikayan sa Central Visayas ang daghang kinabuhi nga makalas atol sa dakong sunog ilabi na sa mga tag-as nga building sama sa mga condominiums, hotels, malls, tunghaan ug mga tambalanan.
Si Tadeo nahinangop sa positibong tubag sa ilang mga gipangimbitar.
Gipasabot ni Engr. Ariel Miranda, hepe sa Fire Safety Enforcement Division sa BFP National Headquarters, ang Basic Fire Safety Measures sama sa pagbaton og mga fire exits, sprinklers, emergency lights, fire alarm ug illuminated directional sign.
Usa sa mga partisipante nisugyot nga mag-mugna sila og Building Administrators Association sa Rehiyon-7 aron mas mapadali na lang unya ang ilang mga tigum ug mahatagan dayon og pagtagad ang mga problema nga posibleng motumaw.
Human sa maong coordination meeting, mopahigayon na usab og Fire Safety Summit ang BFP-7. (BANAT NEWS)
- Latest
