2 ka barko nakasinati og problema
CEBU, Philippines - Duha ka barko nga gipanag-iya sa TransAsia nga adunay biyahe paingon sa Mindanao, nakasinati og problema.
Mohatag lang og clearance ang Maritime Industry Authority (MARINA)-7 ngadto sa MV Trans Asia 2 ug MV Trans Asia 9 kon kini masuta nga haum nang makalarga.
Si MARINA-7 Regional Director Jose Venancio Vero, Jr. niingon nga kagahapon ang management sa maong mga barko nipahibawo kanila nga ilang gisuspenso ang operasyon sa MV Trans Asia 2.
Hinungdan niini, wala na niisyu og order pagsuspenso sa Passenger Ship Safety Certificate si Vero sa nahisgutang barko.
Samtang si Petty Officer 1 Alex Capangpangan, sakop sa Coast Guard Substation-Tinago niingon nga ang MV Trans-Asia 2 naabot sa Cebu kagahapon sa alas 5 sa buntag gikan sa Ozamis ug nasuta nga wala na kini pasakyi og pasahero kay naguba ang ilang aircon sa tourist section.
Nasayran nga naguba sab ang generator sa maong barko matud ni Vero.
Nidugang si Capangpangan nga ang MV Trans Asia 9 gikan sa Cagayan de Oro naabot sa Cebu kagahapon sa alas 6:30 sa buntag. Giingong wala kini nakasinati og engine trouble apan ang problema niini mao ang pagka-ipit sa kable sa rampa.
Kagabii, gisusi sa MARINA-7 ang MV Trans Asia 9 aron masuta kon naayo na ba ang problema niini. (BANAT NEWS)
- Latest
