Managsuon napaig sa balay

CEBU, Philippines - Pito ka buwan nga masuso ug ang 2-anyos niining maguwang ang nangapaig human matanggong sa nasunog nila nga balay diha sa Barangay Busay, sa Lungsod sa Pinamungahan niadtong Biyernes sa buntag.

Natanggong sud sa nagkayo nilang panimalay sila si Jellian Cabantog Papasin (maguwang) ug ang iyang manghod nga pito pa ka buwan nga si Irish Cabantog Papasin.

Si SPO2 Peter Cuenso Jr. mitug-an sa Banat News nga nangapaig gyud ang duha ka mga bata dihang dali nga gikaon ang ilang panimalay sa kayo.

Asoy pa sa maong imbestigador nga alas 8:30 sa buntag nilakaw ang inahan sa mga bata nga si Marivic, 22, kauban ang iyang 7-anyos nga kinamaguwangang anak paingon sa tubod aron manglaba.

Wala’y nabilin sa balay kung di ang upat pa niya ka mga anak nga ang maguwang 6-anyos pa tungod kay nagtrabaho sa syudad sa Sugbo sa construction ang amahan sa mga bata nga si Pedro Papasin, 33.

Sumala pa nga alas 9:20 natingala si Marivic dihang naghangos nga niapas ang iyang 6- anyos ug 5- anyos nga mga anak.

Tungod sa kahadlok wala na makatug-an ang mga bata kun unsay  nahitabo. Ang kauban ni Marivic nga nanglaba nakabantay sa baga kaayong aso gikan sa nahimutangan sa balay ni Marivic.

Nidagan pauli si Marivic sa ilang panimalay nga 500 metros gikan sa tubod apan tungod kay ginama man sa gaay naugdaw na ilang balay ug  ang  napaig nga lawas sa nagtupad niyang mga anak  maoy iyang naabtan.

Wala’y nakatabang nga silingan kay dul-an 100 metros ang ilang distansya.

Matud pa sa doktor nga si Dr. Pausal asphyxia secondary to smoke inhalation ang gikamatyan sa duha.

Si PO3 Froilan Velasquez niasoy sa Banat News nga usa siya sa mga pulis nga miresponde miingon nga pwerte gyung layoa sa maong lugar.

Sa Barangay Poblacion nahimutang ang police ug fire station sa Pinamungahan ug hilit kaayo ang dalan paingon sa balay sa mga biktima.

Si Cuenso niingon nga naglisud sila pag-imbestigar kung kinsa gyud sa mga bata ang nagduwa-duwa og lighter tungod kay ang duha ka mga nakaikyas dili makig-estorya kanila. - /EIM) (BANAT NEWS)