Polis nga mitambal sa samad sa priso, nag-trending
Gitambalan ni SPO4 Vincent Aguanta sa Sogod Police Station ang samad sa ilang piniriso nga si John Roberto Mauro kinsa biktima sab sa disgrasya. Hulagway hinatag ni Keith Monsanto
CEBU, Philippines - Nag-trending sa social media ang usa ka polis kinsa na-assign sa Sogod Police Station human kini maabti sa usa ka netizen nga naghunad sa nagkadugo nga samad sa usa ka piniriso.
Sa post ni Keith Monsanto, iyang naabtan si SPO4 Vincent Aguanta nga nagtambal sa samad ni John Roberto Mauro, 18 anyos, priso sa maong presinto.
Sa iyang pamahayag sa Banat News, ang maong polis mibutyag nga nalooy siya kang Mauro human magkadugo ang samad niini dihang nadisgrasya sa sulod sa selda.
Asoy ni Aguanta, nagpasugo siya og gapas ug betadine sa ilang health center ug iya kining gihunaran samtang siya ang desk officer niadtong tungora.
Dugang niini nga ang pagtambal niya dili mao ang unang higayon apan daku ang iyang pagtuo nga kato lang siya nakuhaan og video ug hulagway.
Iyang gitug-an nga bisan wala pa ang Random Act of Kindness nga program sa Cebu Provincial Police Office, nabatasan na niyang mutabang sa nanginahanglan.
Dul-an sa 22 na ka tuig si Aguanta sa serbiyso nga nagsugod sa Regional Special Action Force hangtod nga na-assign sa nagkadaiyang police stations. Gani hapit na usab siya’ng mag-usa ka tuig sa Sogod Police Station.
Si Aguanta nga minyo, adunay usa ka anak.
Sa iyang bahin, si Mauro mitug-an nga wala siya magdahum nga adunay polis nga mohunad sa iyang samad. Mapasalamaton siya kang Aguanta nga wala kini magdumili sa pagtabang kaniya.
Samtang si CPPO Director Eric Noble sa iyang bahin mahinangpon sa gihimo ni Aguanta ug nagpakita kini sa Random Act of Kindness. Gani mohatag siya og commendation sa gihimo sa maong polis. (BANAT NEWS)
- Latest
