Pag-usab sa tax rate sa siyudad angay tun-an

CEBU, Philippines – Pabor si Bise Mayor Edgardo Labella nga himoan na og kausaban ang tax rate alang sa pagbayad og buhis sa kayutaan, mga building ug makinarya dinhi sa Dakbayan sa Sugbo nga sa dugay na nga katuigan wala gyud mausab.

Matud sa bise mayor nga “long overdue” na kaayo nga kaniadto pa nga 2006 nga nahimoan og kausaban ang tax rate alang sa mga real property units ug wala matuman ang anaa sa balaod nga matag tulo ka tuig himoan gayud og kausaban ang tax rate.

Apan si Labella nga maoy presiding officer sa Cebu City Council miingon nga angay usab nga paminawon ang sentimiyento sa mga tawo nga maapektohan kun ipatuman ang kausaban sa tax rate alang sa mga real property units. Si City Treasurer Tessie Camarillo mipadala og suwat sa City Council ug miawhag nga unta kahimoan og kausaban ang tax rate kay dugay na kaayong katuigan nga wala mausab ang bayranan sa buhis.

Si Konsehal Joey Daluz III, nga alyado sa Team Rama, miingon nga dili kinahanglan nga usbawan ang buhis aron mosaka ang koleksyon sa dakbayan.

Gipasabot ni Daluz nga daghang mga properties nga wala makolektahi sa tukma nga kantidad sa buhis, ug mao kini ang angay nga hingusgan.

Gipasabot ni Daluz nga daghang properties sama sa yuta nga gideklarar pa nga residential ug nagbayad lang ang mga tag-iya og gamay nga buhis matag tuig, apan ang tinuod, ang maong kayutaan gigamit na diay sa commercial ug dagko na unta ang buhis nga mabayaran.

Matud ni Daluz nga dunay uban nga panimalay nga giusab ang desenyo ug gihimo na nga tindahan, apan wala gani magbayad bisan gamay nga buhis ang mga tag-iya. Si Konsehal Jocelyn Pesquera miingon angay’ng paminawon usa ang sugyot sa City Treasurer’s Office kun pila ang gusto nila nga ipausbaw sa buhis alang sa mga real properties usa siya mohatag sa iyang baruganan. /EIM (BANAT NEWS)