El Niño di pa sigurado

CEBU, Philippines – Kun mahinayon ang pagbana-bana sa El Niño, posibleng adunay dry condition o dry spell nga mahitabo karong tuiga, matud sa pangulo sa Philippine Atmospheric Geophysical and Astronomical Services Administration (PAGASA)-Cebu. Si Engr. Alfredo Quiblat, Jr., officer-in-charge sa PAGASA-Cebu, nagkanayon nga adunay 50 percent nga probability nga adunay mahitabo nga El Niño karong tuiga.

Apan, adunay taas nga “uncertainty” sa forecast consensus nga nakuha sa maong buhatan karong mga panahona. Iyang giklaro nga gubot ug wala pa nagkasinabot ang mga weather model o analyses sa mga nagkalainlaing prediction centers sa gawas sa nasud.

Si Quiblat mipasabot nga posibleng masinati ang dry spell kun mahinayon gyud ang El Niño mao nga angay pa kining sutaon.

Matud niya, ang El Niño phenomenon mahitabo nga adunay kakuwang sa pag-ulan maong posibleng makaingon kini og dry condition o dry spell.

Naglaum si Quiblat nga dili kini makadala og dakong kadaut sa umahan kay sa ilang pagbana-bana, ang Probinsya sa Sugbo makasinati og “near normal” rainfall condition sugod karon hangtud sa buwan sa Hulyo. -/DILT (BANAT NEWS)