Osmeña maoy mohatag og reward

CEBU, Philippines - Nagplano si Cebu City Mayor Tomas Osmeña nga mohatag og P100 mil nga reward sa habal-habal driver nga maoy hinungdan sa pagka-neutralize sa nakaikyas nga mga sakop sa Abu Sayyaf didto sa lungsod sa Clarin, Bohol.

Kahinumduman nga niadtong adlaw’ng Sabado laing engkwentro ang nahitabo sa Barangay Bacani sa maong lungsod nga niresulta sa pagkapatay sa upat ka mga sakop sa Abu Sayyaf apil na ang giingong local contact sa grupo nga si Joselito Melloria alyas Abu Alih.

Si Osmeña miingon nga kun ang Probinsiya sa Bohol dili mohatag og reward ang siyudad sa Sugbo maoy mohatag niini aron dasigon ang uban nga motabang sa mga otoridad sa kahapsay ug kalinaw.

Si Police Regional Director Chief Supt. Noli Taliño niklaro nga ila pang sutaon kung wa bay laing nakahatag og impormasyon gawas sa drayber nga karon ilang giproteksyonan.

Ang maong drayber maoy gisakyan sa usa ka lalaking matud pa lago ug baho nga mopalit unta og pan sa Tubigon, apan kay layo adto niya kini gidala sa sentro sa Clarin  ug human napalit ang pan nga balor P400 gihatud niya kini pagbalik didto sa Bacani. Human nahatud ang maong lalaki, daling mipasirit ang drayber padung sa police station ug gisumbong ang maong hitabo hinungdan sa gilusad nga operasyon. Decemay Padilla ug Camille Pateres (BANAT NEWS)