Bag-ong lagda ipasunod sa mga tanod, garbage collectors

CEBU, Philippines - Gipahibawo ni Konsehal Dave Tumulak nga isip kabahin sa evaluation aron mahibalik ang honoraria sa mga barangay tanod, garbage collector ug loaders, kinahanglan tumanon nila ang mga bag-ong kamanduan sa kagamhanan.

Nasayran nga gawas sa surprise drug test, ang mga kawani giawhag sab nga tumanon ang pipila ka lagda sama sa dili pagtambong og tigbakay ug hantak; dili mahimong mosulod sa mga balay nga adunay video karera; dili moduol sa mga suspected drug pusher ug kinahanglan silang mokooperar sa barangay kun adunay kalihukan.

Matud ni Tumulak nga nasayod na ang maong mga kawani human nila gipatuman ang balaod sa miaging buwan. Kinahanglan kini nilang tumanon bisan pa man og off duty sila.

Kinahanglan usab nga mosumetir sila sa ilang accomplishment reports aron ikasuporta sa pagkuha sa ilang honoraria.

Subay niini, gidasig sa konsehal ang katawhan nga kun adunay mga wala motuman sa ilang lagda, i-report kini dayon sa iyang buhatan aron iyang maaksiyonan.

Gibuhat kini sa kagamhanan kay daghan sila’g nadawat nga taho nga adunay mga tanod ug loaders nga motambong og birthday party sa mga gidudahang pusher, mga dapit nga adunay video karera ug adunay uban nga mangutang aron ipalit og ginadiling drugas. Kun masakpan nga adunay misupak, taktakon sila sa serbisyo.

Masaligon ang konsehal nga kun mahuman na ang evaluation, mabalik na unya ang paghatag og honoraria sa mga tanod, garbage collectors ug loaders. (BANAT NEWS)