Osmeña motambong sa CCLEX groundbreaking

CEBU, Philippines - Gikompirmar ni Cebu City Mayor Tomas Osmeña nga motambong siya sa groundbreaking ceremony sa Cebu-Cordova Link Expressway (CCLEX) karong Huwebes diin motambong si Presidente Rodrigo Duterte.

Kini bisan dili maayo ang ilang relasyon ni Presidential Assistant for the Visayas Michael Dino.

Gipatin-aw ni Osmeña ang pamahayag ni Dino nga matud pa wala siya’y labot sa kalambuan sa maong proyekto sanglit si kanhi Cordova mayor, karon Presidential Adviser on Legislative Affairs, Secretary Adelino Sitoy ang naninguha niini sa panahon usab ni kanhi Cebu City mayor Michael Rama.

Matud ni Osmeña nga may natampo siya sa maong plano pinaagi sa pag-usab sa ubang detalye sama sa dili pag-demolis sa pipila ka residente sa Barangay Pasil nga nagpuyo habig sa Guadalupe River.

 Ang proponent sa proyekto nga mao ang Metro Pacific Tollways Development Corporation nisanong sa hangyo ni Osmeña.

Gipasabot sa mayor ngano niadtong 2013 supak siya sa katukuran sa 8.25-kilometer Cebu-Cordova Bridge tungod sa demolisyon.

Samtang gawas ni Duterte, motambong sab si Manuel Pangilinan, chairman sa MPTDC; Rodrigo Franco, presidente sa MPTDC, Cordova Mayor Mary Therese Sitoy-Cho ug amahan nga si Sec. Sitoy.

Ang tanang kongresista sa Sugbo ingon man ang gobernador sa Cebu, Bohol, Leyte ug Negros Oriental ug mga opisyal sa Dakbayan sa Sugbo ug sa sixto distrito ang imbitado sab sa maong kalihukan.

“We have high hopes for the immediate construction of CCLEX. We are excited as the new bridge will surely stir-up Cordova’s local economy, and lead to its becoming one of the highly-urbanized cities of Metro Cebu and eventually become a competitive eco-tourism gateway in the Visayas,” matud ni Sitoy-Cho.

Dungag pa ni Sitoy-Cho nga ang konstruksiyon sa maong bridge makahatag kini og oportunidad sa panarbaho sa iyang mga konstituwente. (Decemay P. Padilla ug Mitchelle L. Palaubsanon/GMR)

Fire Prevention Month sugdan ugma

Han-ay na ang mga kalihukan sa Fire Prevention Month 2017 nga pormal nga magsugod ugmang adlawa uban sa tema nga, "Buhay at Ari-arian ay Pahalagahan, Ibayong Pag-iingat sa Sunog ay sa Sariling Pamamahay Simulan."

Buksan ang kalihukan pinaagi sa Walk for Fire Safety sa alas singko sa buntag nga manukad sa rehiyonal nga buhatan sa Bureau of Fire Protection sa may N. Bacalso Avenue, Dakbayan sa Sugbo.

Isunod dayon ang fire-fighting and rescue demonstration sa kabomberuhan.

Atol sa pagbukas sa kalihukan, dunay Santos nga Misa ug isunod dayon ang press conference ug ang motorcade.

Matud ni BFP-7 Director Samuel Tadeo nga aron epektibo ang kampanya batok sa sunog, kinahanglang motabang ang katawhan pinaagi sa pag-apil sa fire drills, seminar sa kabarangayan ug uban pa.

Samtang sa laing bahin kagahapon giapod-apod sab sa mga sakop sa BFP-7 ang ilang 100 ka putos nga hinabang sa mga nasunugan sa Barangay Tisa.

Matud ni Senior Fire Officer 1 Wendell Villanueva, tigpamaba sa BFP-7, nga unang higayon nila nga moapod-apod og hinabang nga gilangkuban sa bugas, de lata ug uban pa. (BANAT NEWS)