Gipusil sud sa barber shop patay

CEBU, Philippines - Patay ang 39-anyos nga lalaki nga tag-iya og barber shop human kini gipusil samtang nagtan-aw og telebisyon sa iyang shop sa Tabura St. Pardo, Dakbayan sa Sugbo pasado alas 11 kagahapon sa buntag.

Giila ang biktima nga si Ronald Tabura, ulitawo, nagpuyo sa maong dapit.

Ang krimen nahitabo dili layo sa Pardo Police Station.

Matud ni Police     Officer 3 Winston Ybañez, imbestigador sa homicide section sa Cebu City Police Office, nga sa pagkakaron personal ang motibo nga ilang gisubay sa maong krimen.

Sumala pa ni Ybañez nga samtang nag-atubang sa telebisyon ang biktima usa ka lalaki nga nagsuot og pulos itom nga nagkawo ang kalit lang niduol ug namusil sa biktima.

Sobra sa tulo ka samad pinusilan sa lawas ug ulo ang naangkon sa biktima kinsa nakabsan diha-diha sa gininhawa.

Human sa pagpamusil giingong yano ra sab kaayo nga nibiya sa lugar ang gunman nga naglakaw.

Duha ka deformed slug sa wala matino nga kalibre sa armas ang narekober sa kapolisan sa crime scene.

Wala na nihatag og dugang impormasyon ang kapolisan kung unsa nga personal nga kaso ang posibleng motibo sa krimen kay nagpadayon pa ang ilang imbestigasyon. (BANAT NEWS)