Minors sagad biktima sa pabuto sa probinsiya

CEBU, Philippines - Sagad sa nabiktima sa pabuto sa pagsugat sa Bag-ong Tuig sa Probinsiya sa Sugbo mga minor de edad, matud ni Dr. Rene Catan, hepe sa Provincial Health Office.

Si Catan nibutyag nga nagpanuigon sa 12-anyos paubos ang mga biktima kinsa kasagaran nabuthan sa kamot ug tiil ug dunay duha ang nabuthan sa mata.

Sa Carcar Provincial Hospital dunay pito ka biktima ang natala, duha sa Bogo Provincial Hospital, upat sa Balamban Provincial Hospital ug duha sa Danao Provincial Hospital.

Matud ni Catan nga dunay 60-anyos nga taga Dakbayan sa Carcar ang nakabaton og samad pinusilan apan nagdumili kini sa pagpa-admit sa tambalanan.

Ang Department of Health ug ubang ahensiya kanunay nga nagpahimangno sa pagdili sa pabuto sa Pasko ug Bag-ong Tuig aron paglikay sa disgrasya.

Ang hunta probinsiyal nipalabang sab og resolusyon nga nag-awhag sa publiko nga imbes pabuto mogamit na lang og alternatibo nga makamugna og saba sa pagsugat sa Pasko ug Bag-ong Tuig.

Gawas nga kuyaw sa disgrasya makadaut sab sa panglawas ang aso sa pabuto ilabi na kadtong dunay mga hubak.

Sa laing bahin, kasagaran kung dunay okasyon nga saulugon dunay mabiktima sa food poisoning ilabi na nga ang pagkaon wala matarung sa pagluto o ba kaha na-exposed kini.

Hinuon walay nadawat nga report gikan sa mga tambalanan sa probinsiya ang PHO nga dunay nabiktima sa food poisoning sa pagsaulog sa okasyon. -/GMR (BANAT NEWS)