Security patrol gilusad sa PNP, AFP

CEBU, Philippines – Sa pagseguro nga mahatag ang hugot nga seguridad sa Dakbayan sa Sugbo, nihimo og joint security patrol ang kapolisan ug kasundaluhan.

Ang director sa Cebu City Police Office, Senior Supt. Joel Doria, niingon nga usa ka “joint visibility patrol” ang ilang himoon kauban ang kasundaluhan ug K9 dogs diin usa sa ilang liboton ang mga terminals, pantalan ug uban pang dapit nga sagad dugukon sa mga tawo.

Kini isip abag sa mga gipakatap nang daan nga mga polis sa palibot aron walay lusot ang mga tawo nga nagplano og dili maayo karong panahona.

Sa pagkakaron si Doria niingon nga wala silay nadawat nga bisan unsa nga hulga sa seguridad sa siyudad apan padayon ang ilang pakig-alayon ilabi na sa mga Muslim leaders sa Sugbo.

Sigun pa ni Doria nga kung makita sa mga tawo ang mga sundawo sa palibot dili angayan nga mahadlok ang mga tawo kay kini tipik lang sa paghatag og seguridad sa gobiyerno sa palibot.

Gani usa sa ilang plano nga maghimo og mga joint checkpoints.

Gawas sa kasundaluhan kauban sab sa kapolisan ang nagkalain-laing grupo ug mga force multipliers alang sa pagbantay sa dakbayan aron mahimong malinawon ang Bag-ong Tuig.

Samtang gimando ni Mandaue City Police Office director, Senior Supt. Roberto Alanas ang higpit nga pagbantay sa mga vital installation sa dakbayan ug ingon man ang nagkadaiyang malls ug mga simbahan nga sagad magtapok ang daghang mga tawo sa pagsugat sa tungang gabii sa Bag-ong Tuig 2017.

Si Alanas nimando na usab sa mga hepe sa unom ka presinto sa MCPO sa pagpahigayon og adlaw ug gabii nga mga checkpoints aron pagpakgang sa mga dautang elemento nga planong mohimo og ilegal nga kalihukan.

Kini gihimo sa kapolisan human sa bag-ohay lang nahitabo nga pagpamomba sa Hilongos, Leyte.

Si Alanas nipasabot nga ang Dakbayan sa Mandaue ilang giisip nga usa sa mga dapit nga sentro sa plano sa mga dautan tungod kay usa kini ka malambuon nga lugar.

Naa sab nahimutang ang mga vital installations sama sa duha ka taytayan nga mao ang Marcelo Fernan Bridge ug Mandaue-Mactan Bridge.

Lakip sa higpit nga bantayan ang mga communication facilities nga naglakip sa mga cell sites, mga media outlets ug uban pa.

Dugang ni Alanas nga gawas sa mga checkpoints, ila sab ipakatap ang mga uniformed ug non-uniformed nga mga sakop sa kapolisan sa tuyo nga ang mga dautang elemento kapugngan sa paghimo sa ilang ilegal nga kalihukan. - /GMR) (BANAT NEWS)