PWD naninda gitiklo

CEBU, Philippines – Patay ang usa ka lalaki nga may kabilinggan sa panglawas nga gipusil sa duha ka lalaki nga nag-motorsiklo sa Purok Monggos, Paknaan, Dakbayan sa Mandaue alas 11 pasado sa niaging gabii.

Si Senior Police Officer 3 Noel Balila sa Presinto 3 sa Mandaue City Police Office niila sa biktima nga si Sergio Pepito Dean, 42, nagpuyo sa maong dapit.

Matud ni Balila nga diha sa iyang gamay nga tindahan ang biktima nga nahimutang daplin sa karsada dihang nihunong ang duha ka motorsiklo ug ang duha ka angkas niini ang nanganaug dayong duol sa nahimutangan sa biktima ug gipusil sa makadaghang higayon.

Ang biktima nga naigo sa iyang mata, abaga, kilay, ilong, dunggan ug uban pang bahin sa kalawasan ang namatay gyud nga wala na madala sa tambalanan.

Ang duha ka wala hiilhing lalaki nga nakaseguro na nga patay na ang biktima ang nagdali sa pagsakay og balik sa motorsiklo ug nisibat.

Si Balila niingon nga dili pa gyud nila maseguro kung kinsa ang grupo sa mga lalaki nga nagpusil patay sa biktima apan nagpadayon ang ilang imbestigasyon.

Dugang ni Balila nga dili sab nila malambigit ang katahap sa ilegal nga drugas tungod kay ang namatay wala man matala sa ilang buhatan nga nalakip sa mga drug personalities. - /GMR) (BANAT NEWS)