Seniors aduna nay buhatan sa Kapitolyo

CEBU, Philippines - Human sa walo ka tuig nga pinaabot, gihatagan na og katumanan sa Kapitolyo ang gipangayo nga buhatan alang sa Cebu Provincial Federation of Cities and Municipalities Senior Citizens Association of the Philippines, Inc. (CPFSCAP).

Gipahibawo sa pangulo sa Provincial Social Welfare and Development Office, Marivic Garces, atol sa niaging Senior Citizens Day nga gitrabaho na ang maong buhatan nga anaa nahimutang sa ikaduhang andana sa Legislative Building.

Ang pahibawo ni Garces maoy tubag sa gipresentar nga resolusyon sa pangulo sa CPFSCAP, Amelia Kiamko, nga nangayo og opisina sa Kapitolyo.

 Si Bokal Jose Mari “Tata” Salvador, chairman sa committee on senior citizens affairs, nipasalig usab sa iyang suporta sa CPFSCAP.

 Hangyo lang ni Salvador nga giyahan lang siya sa mga opisyal sa ilang panginahanglan labi na nga bag-o pa siya sa katungdanan ug labaw pa nga dili pa siya senior citizen.

 Buot ni Salvador nga makatambong siya sa mga meetings sa mga opisyal sa CPFSCAP aron masayod sa mga kalihukan nga nagkinahanglan og suporta gikan kaniya.

 Nagpasalamat si Salvador kang Gobernador Hilario Davide III ug Bise Gobernador Agnes Magpale sa pagpaminaw sa gipangayo sa mga senior citizens. (/DILT)

  (BANAT NEWS)