Wa pay budget pagpaluag sa CPDRC

CEBU, Philippines - Ang kagamhanan sa probinsiya wala pay magahin nga budget niining tuiga nga magamit sa pagpatukod og dugang selda sa Cebu Provincial Detention and Rehabilitation Center (CPDRC) aron maluag ang kahimtang sa mga piniriso.

Kini bisan pa man nga adunay napulo ka piniriso na ang namatay sugod niadtong naghinapos nga bulan sa Hunyo ug ning bulan sa Hulyo nga kasagaran naglisud sa pagginhawa tungod sa sakit sa kasing-kasing, baga ug atay nga ilang gihambin.

Gibutyag sa warden sa CPDRC nga si Romeo Manansala nga mokabat na ngadto sa 3,000 ang gidaghanon sa piniriso karon, ang kapasidad sa mga selda aduna lamang 12, 16 ug 18 ka priso apan karon ang matag selda may sud na nga 20, 30 ug 40 ka piniriso. Si Gob. Hilario Davide, III mibutyag kagahapon sa Banat News nga usa sa ilang gilantaw karon mao ang expansion sa CPDRC apan wala maapil sa budget niining tuiga ang maong proyekto. Matud niya nga halos tanan prisohan dili lang sa Sugbo apan lukop nasud ang nakasinati og samang problema.

Sa laing bahin, kabahin sa planong pagpaluag sa prisohan pinaagi sa pag-atiman sa kaso sa mga piniriso nga overstaying na wala na kini matagad karon. Sayo pa, dunay mga paralegal ang  mianha na sa CPDRC ug misusi sa  mga kaso sa piniriso nga overstaying na o angayan na untang makagawas apan matud ni Davide didto sa korte malangan kay daghang mga piniriso ang walay abogado.  (BANAT NEWS)