PDEA-7 may bag-ong direktor na

CEBU, Philippines - Target sa bag-ong nilingkod nga direktor sa Philippine Drug Enforcement Agency -7 mao ang mga top drug personalities sa rehiyon.

Ang Sugbuanon nga si Yogi Filemon Ruiz kinsa nihulip ni Ronald Allan Ricardo niingon nga kadtong mga pangalan sa mga drug personalities nga gihatag gikan sa mga opisyal sa barangay ug kapolisan maoy ilang una karon nga pangitaon.

Sa pagkakaron kompleto na ang lista ni Ruiz sa mga drug personalities sa rehiyon.

Nanghinaut sab si Ruiz nga kung mahimo dili na mosukol ang mga drug personalities nga ilang dakpon aron wala nay dautang mahitabo.

“Naa tay nahibaw-an nga namalit pud sila og armas,” matud ni Ruiz.

Gipasalig ni Ruiz nga dili kini magpakauwaw sa ilang trabaho isip usa ka Bisdak ug sa iyang paglingkod karon sa PDEA-7 iyang gipaneguro nga wala nay mahitabong operasyon nga inimbento lang.

Nibahad sab si Ruiz nga kung duna kini masakpan nga iyang mga sakop nga nalambigit sa mga binuang, iya gyud kining silutan.

Plano ni Ruiz nga makigkita sa direktor sa Police Regional Office-7, Chief Supt. Noli Taliño, aron magkahiusa ang kapolisan ug PDEA-7 sa kampanya sa drugas.

Positibo si Ruiz nga sulod sa tulo hangtud unom ka buwan masumpo ug maratsada gyud sa mga gitahasang ahensiya sa gobiyerno ang paggukod sa ilegal nga drugas.

Nagtuo si Ruiz nga ang mga padayong nagbaligya karon sa drugas igo na lang nitiwas sa ilang sobra nga supply sa shabu.

Samtang ang pusher og shabu nga si Marjun Nuñez, 28-anyos nga taga Day-as, Cordova maoy usa sa 300 nga nitahan sa kapolisan sa Oplan Tukhang.

Si Police Officer 1 Richard Lood sa kapolisan sa maong lungsod nagkanayon nga si Nuñez nipirma na og panaad nga mohunong na kini sa ilegal nga kalihukan.

Matud ni Lood nga paglabay sa pipila ka adlaw nakadawat sila og taho gikan sa mga silingan nga si Nuñez   nibalik kini sa ilegal nga kalihukan hinungdan nga gihimo ang buy-bust operation ug nasakmit ang unom ka paketeng shabu.

Hinuon si Lood niingon nga si Nuñez wala mopakita og pagsukol kanila hinungdan nga dali kini nilang nasikop. Jojo C. Ugdol ug Romeo T. Limpangog (BANAT NEWS)