Lugway sa SK registration gihangyo

CEBU, Philippines - Nihangyo ang Akbayan Youth sa Commission on Elections nga lugwayan ang mga adlaw sa pagpangrehistro sa mga botante sa eleksiyon sa Sangguniang Kabataan nga mapupos na karong Hulyo 30.

Si Chatch Calderon, usa sa Akbayan Youth organizers, niingon nga kasagaran sa mga botante mga estudyante ug ang uban dili makaparehistro tungod kay naay klase.

“As a youth naa man guy nag-eskwela unya dili kagawas sa ilang klase, unya ma-discourage mogawas kay taas kaayo og linya, unya kapuyan na lang,” matud ni Calderon.

Apan ang Comelec niingon nga dili na mahimong madugangan pa og laing adlaw ang pagpangrehistro kay kuwang na sila sa oras sa pagpangandam sa dungan nga eleksiyon sa SK ug Barangay.

Ang pagpangrehistro nagsugod niadtong Hulyo 15. Awhag sa Comelec sa mga wala pa narehistro nga unta sila mangita’g paagi para makaparehistro. (BANAT NEWS)