Trapik, merkado sa Tabunok atimanon

CEBU, Philippines - Tinguha karon ni Talisay City vice mayor-elect Alan Bucao ang pag-atiman sa problema sa trapik kung makalingkod na siya sa katungdanan.

Si Bucao ang author sa ordinansa sa pagmugna sa City of Talisay-Traffic Operation Development Authority (CT-TODA).

Ang mayor ang chairman sa CT-TODA apan matud ni Bucao nga siya ang natahasan nga mangulo pinaagi sa executive order sa panahon ni kanhi mayor Socrates Fernandez.

Kabahin sa merkado sa Tabunok, gibutyag ni Bucao nga gikasabutan na nila ni mayor-elect Eduardo Gullas nga magpabilin kini sa nahimutangan karon apan ilang ayuhon. Maghimo usab sila og plano nga maluag ang kahuot sa trapiko sa Tabunok.

Paningkamutan sa ilang administrasyon nga dili sila mangutang og kwarta sa pagpaayo sa merkado.

Matud usab ni Bucao nga ang merkado sa Lagtang giplanuhan nga mahimong training school sa Technical Education and Skills Development Authority.

Si Bucao mapasalamaton nga nakapahuway siya og tulo ka tuig sa politika tungod kay nabuhat niya ang tanan niyang personal nga gimbuhaton.

Niadtong 2001 si Bucao nidagan sa pagka-bise mayor sa siyudad apan napilde ni kanhi bise mayor Lani Abarquez. Sa 2004 hangtud 2010 napili siyang konsehal ug nihulip ni Abarquez isip bise mayor hangtud 2013.

Niadtong 2013 si Bucao naparot ni outgoing vice mayor Romeo Villarante. (BANAT NEWS)