CESET manakop sa hugawan atol sa eleksiyon

CEBU, Philippines - Mokabat sa 500 ka sakop sa Cebu City Environmental Sanitation and Enforcement Team ug Barangay Environmental Officers ang ipakatap sa tanang eskwelahan sa dakbayan atol sa eleksiyon karong Mayo 9.

Matud sa pangulo sa CESET, Grace Luardo, nga sugod sa pag-abli sa polling precincts hangtud mahuman aduna silay mga sakop aron mopatuman sa kalimpyo sa palibot. Sumala pa ni Luardo nga atol sa adlaw sa eleksiyon dili sila mohunong sa pag-implementar sa balaud diin andam gihapon sila mosikop sa mga tawo nga magpataka og labay sa basura, pagpangihi bisan asa ug pagpanigarilyo sa wala gitugot nga lugar.

Dugang ni Luardo nga mopahigayon sila og pakisusi sa tanang eskwelahan aron sutaon kung aduna bay mga basurahan nga ipahimutang sa mga designated nga lugar.

Awhag ni Luardo sa katawhan nga mobisita sa mga eskwelahan nga dili magpataka og labay sa ilang mga basura. (BANAT NEWS)