Duha ka abogado

CEBU, Philippines - Duha ka abogado ang gipapriso human nasakpan sa asawa nga usa usab ka abogada sulod sa usa ka pension house kagahapon sa buntag diha sa Brgy. Mabolo, Dakbayan sa Sugbo.

Matud ni Senior Chief Inspector Wildemar Tiu sa Mabolo Police Station nga nagpatabang ang 34 anyos nga abogada kanila human niya nakit-an ang bana diha sud sa usa ka lawak sa usa ka pension house sa Mabolo kauban ang laing babaye nga usa usab ka abogada.

Sumala pa nga aduna nay lama ang relasyon sa magtiayon kay adunay laing babaye ug gani nagkakomprontase na silang tulo sa miaging tuig. Sa pakighinabi sa Banat News sa asawa gibati lang siya kalit og pagduda nianang pagka-Huwebes sa gabii kay dugay nakauli iyang bana gikan sa hearing sa kaso sa Mandaue City.

Misuway siya pagsuroy sa opisina sa bana diha sa Ayala Business Park apan wala kini didto hinungdan nga nagduda siya ug milabyog usab siya sa opisina sa gidudahan niyang karelasyon sa bana nga nahimutang duol ra sa maong dapit.

Apan wala usab didto ang abogadang giingong karelasyon sa iyang bana mao nga misuway siya paglibot ug nakaagi sa pension house duol ra usab sa maong lugar. Nakugang  siya nga atoa didto ang ilang pick-up  mao nga mikanaog siya ug nangutana sa guwardiya ug gipahulagway kun kinsay sakay niini. 

Matud niya mitabang ang guwardiya ug ang front desk ug didto pinaagi sa paghangyo nakombinsir niya ang kawani ug nihatag kini sa keycard sa lawak nga giokupar sa iyang bana.  Kauban iyang helper, gitawgan niya ilang ‘ninang’ ug nidangop sa kapolisan ug pagkahuman ilang giadto ang lawak kauban ang roomboy sa pension house. Sumala pa nga wala mangabli ang iyang bana bisan giunsa og tuktok gikan sa alas-9 sa gabii hangtud na lang paglabay sa 11 ka oras. Buntag na dihang nakadesider sila nga ablihan ang lawak.

Matud pa sa abogada, dihang siya nakasulod ug pasigahon unta ang suga gilubag sa iyang bana ang iyang kamot hinungdan nga nitabang ang mga polis ug naaresto ang bana.

Ang abogadang kauban niini sa lawak, diha nagtago sa kasilyas mihangyo nga  babaye ang mosikop kaniya.

Ang duha gidala dayon sa Mabolo Police Station ug gipaslak sa prisohan ug gipasakaan dayon og kasong paglapas sa RA 9262 kon Domestic Violence ug RA 334 kon Concubinage, ug Anti Violence Against Women and Children ang abogado. Ang duha nakabutang og piyansa.  Ang reklamante mosang-at og disbarment case batok sa duha. Suway nga gikuhaan og habig sa mga tigbalita ang abogadang gipasanginlang kabit apan nagdumili kini pakigestorya. (BANAT NEWS)