Incentives sa honors gihangop sa DepEd
CEBU, Philippines - Niuyon ang Department of Education-Cebu City Division ug Parents-Teachers Association sa paghatag og incentives sa mga honor graduates sa tanang pangpubliko’ng eskuwelahan sa elementarya ug sekondarya sa siyudad.
Si Konsehal Alvin Dizon, nangamahan sa ordinasahon sa paghatag sa incentives, niduso og P3,000 sa valedictorian; P2,000 sa salutatorian; P1,000 sa first honorable mention; tag P500 sa second hangtud sa eighth honorable mention. Matud ni City Schools Division Superintendent, Dr. Bianito Dagatan, nga ang mao’ng ordinansahon makapadasig sa kabatan-onan nga magtuon aron makahatag og pasidungog sa ila’ng ginikanan.
Apan matud ni Dagatan nga wala’y mogradwar sa high school karong tuiga tungod sa pagpatuman sa K to 12 basic education system.
Si Isidro Tumulak Jr., presidente sa PTA, niingon nga ang mao’ng ordinansahon makapa-develop usab sa mga bata aron mamahimo’ng responsable.
Apan si Konsehal Sisinio Andales buot nga ipa-review ang ordinansahon kun apilon ba sa paghatag og insentibo ang mga mogradwar nga may medalya nga dili taga siyudad.
Dugang ni Andales nga angay sab himoan og guidelines ang mga transferees gikan sa pribado’ng tunghaan nga mobalhin sa public schools aron maka-avail sa incentives.
Matud ni Dizon nga iya’ng ikonsiderar ang tanang sugyot ni Andales atol sa deliberation sa ordinansahon sa konseho.
Matud ni Dizon nga ang Local School Board ang mobuhat sa guidelines alang sa implementasyon sa ordinansa. (BANAT NEWS)
- Latest
