Kanhi polis napatay sa pinusilay

CEBU, Philippines -  Patay ang usa ka kanhi polis human siya nakigpinusilay sa kapolisan nga mironda sa iyang panimalay sa Barangay Luray 1, dakbayan sa Toledo tungod sa report nga kanunay kining magdala og armas ug manghulga.

Ang mga sakop sa Intelligence Branch sa Cebu Provincial Police Office (CPPO) napugos sa pagpusil ni Terry Tubalado tungod kay dihang mo-search na unta ang mga polis kagahapon sa buntag, midali kini pagbunot og armas.

Si Tubalado adunay ranggo nga Police Officer-3 kaniadto apan natangtang sa serbisyo tungod kay wala na motunga sa iyang duty.

Matud ni CPPO Intelligence chief Rodolfo Albotra nga makadaghan na nga higayon nga nasigpatan si Tubalado nga magdaladala og armas ingon man granada.

May inpormasyon pa ang kapolisan nga usahay iitsa pa ni Tubalado ang granada nga iyang dala ngadto sa mga istambay apan dili niya kuhaan og pin. Usahay magpabuto usab si Tubalado sa iyang armas nga gikahadlok sa iyang mga silingan.

Tungod niini gipanid-an sa mga polis si Tubalado hangtod nga nakompirmar ang report nga ilang nadawat. Ang mga sakop ni Albotra mikuha og search warrant gikan ni RTC Judge Jerry Dicdican nga nagtugot kanila nga maronda ang balay ni Tubalado.

Matud ni Albotra nga pagsulod sa iyang mga sakop, nakita nila si Tubalado nga naghingos pa og shabu apan dali kini nga mibunot sa iyang pistola ug namusil human iyang nakita ang mga polis.

Kini maoy rason nga napugos ang mga polis sa paggamit sa ilang armas ug napatay si Tubalado. Gidala pa sa mga polis si Tubalado sa ospital apan wala na kini maluwas.

Ang napatay nga si Tubalado nakuhaan og usa ka .45 kalibre nga pistola nga duna’y mga bala. Gawas sa armas narekober usab sa kapolisan ang usa ka granada ingon man usa ka medium size nga shabu ug drug paraphernalia.

Si Tubalado mi-AWOL kaniadtong 2014. Na-recruit siya sa Police Regional   Office-13 sa CARAGA Region ug dayon nabalhin siya sa Police Regional Office-7.

Nakaserbisyo si Tubalado kaniadto sa Argao Police, Toledo City Police Station, Provincial Public Safety Company, Talisay City Police ug sa Compostela Police Station. (BANAT NEWS)