Sakop sa Centennial Force nakigginukdanay sa SWAT
CEBU, Philippines - Nagtingkagol sa selda sa kapolisan sa Lungsod sa Balamban ang 60-anyos nga lalaki nga sakop sa Centennial Force human nakabangga og motorsiklo ug suway usab nga gidasmagan ang usa ka polis sa Barangay Pundol pasado alas 10 sa nakalabay nga gabii.
Patong-patong nga kaso ang atubangon ni Salvador Almario, taga Barangay Prenza, human kini nakuhaan pa og armas nga gisulod sa iya’ng sling bag.
Matud ni Police Officer 1 Monchito Clarin, desk officer sa Balamban Police Station, nga una’ng nakabangga og motorsiklo si Almario samtang nagmaneho kini sa usa ka Toyota Hi-Ace van.
Naangol sa insidente ang drayber sa motorsiklo nga si Jerome Copas ingon man ang duha ka back riders nga sila si Elmer Pogoso ug John Martin Monteroso.
Apan imbis mohunong, nipabulhot og pagpadagan sa sakyanan si Almario hangtud nga kini gialarma sa kapolisan.
Ang mga sakop sa Special Weapon and Tactics (SWAT) Team ang dali nga niresponde kinsa usa sa ila’ng sakop ang nibabag sa suspek apan gisuwayan hinuon pagdasmag ug swerte nga nakalikay.
Naabot ang ginukdanay sa barangay Prenza hangtud nga nisulod sa sudlonon nga dalan ang suspek diin nanaug kini ug nisutoy og dagan apan abtik nga nakagukod ang kapolisan hangtud nasikop.
Narekober sa kapolisan ni Almario ang usa ka .45 caliber pistol nga duna’y upat ka bala.
Si Clarin niingon nga posible’ng gumikan sa kahadlok sa suspek nga nakadasmag og motorsiklo hinungdan nga kini nisibat.
Dugang pa ni Clarin nga swerte pa ang suspek kay atol sa ginukdanay wala kini pusila sa mga sakop sa SWAT Team. (BANAT NEWS)
- Latest
