Lola namatay, natagak sa habal-habal

CEBU, Philippines - Usa ka lola namatay human siya matagak sa gisakyan niya nga motorsiklo’ng habal-habal didto sa Barangay Basak, Samboan kaniadtong Miyerkules sa hapon.

Ang namatay mao si Zozima Dingal, minyo ug nagpuyo sa Barangay Basak. Natagak si Dingal sa motorsiklo nga gimaneho ni Carvin Gutib, 26-anyos,       minyo.

Si PO2 Joseph Belangoy, desk officer sa Samboan Police Station, miingon nga gikan sa lungsod si Dingal human kini nangompra og kagamitan sa panimalay.

Matud ni PO2 Belangoy nga pag-abot nila sa kurbadahong bahin sa Barangay Basak, kalit lang natagak ang tiguwang ug gituohan nga wala kini makabalanse sa iyang paglingkod.

Nasayran nga ang tiguwang naglingkod nga binabaye ug gituohan nga maoy rason nga wala kini makahinimbang diha nga mitakilid ang motorsiklo pag-abot sa kurbada.

Matud pa nga napantok ang ulo sa tiguwang ngadto sa aspaltado nga karsada ug maoy hinungdan nga grabe ang iyang kahimtang nga gidala sa Samboan Municipal Health Center, apan namatay gyud ang biktima.

Ang pamilya sa tiguwang gihangyo karon ni Belangoy nga dili na lang mokiha ug bugti niini, motabang sila pagpalubong sa tiguwang. Si Gutib gitanggong pa sa kapolisan. (BANAT NEWS)