Manag-uyab nga Koreano nadam-agan sa bus
CEBU, Philippines – Maghigugmaay nga Koreano nahaigking tungod sa kakusog sa sirbato sa sakyanan sa paglabang nila sa karsada didto sa Talisay ug mao nga mikalit sila’g atras ug nadam-agan na hinuon sa bus.
Ang lalaki nga Koreano nga si Donggeun Kang, 22, namatay samtang ang iyang girlfriend nga si Hyegin Lee, 22, nakaangkon og mga pangos sa kalawasan.
Ang duha temporaryo nga nagpuyo sa ilang tunghaan sa Cebu English Language Center sa Barangay Bulacao, Talisay.
Ang drayber sa Ceres bus (GXU-5186) nga nakadam-ag mao si Joventino Suerte, 50-anyos, minyo nga taga Barangay Bukay Tulay, lungsod sa Minglanilla.
Si PO3 Aquilles Cabando saTalisay City traffic division miingon nga ang bus gikan sa siyudad sa Sugbo ug paingon kini sa habagatang bahin, apan pag-abot niini sa Barangay Bulacao kalit nga nilabang ang duha ka Koreano nga nag-inagbayay.
Sanglit kusog ang dagan ni Cabando mao nga iyang gisirbatohan ang mga milabang sa karsada.
“Pagsirbato man gud naigking ang duha tungod sa kakusog sa sirbato ug nakaatras ang duha mao na nga naigo gyud hinuon,” matud ni Cabando.
Patay diha-diha dayon ang lalaki kay nabuak ang iyang ulo samtang ang babaye nadat-ugan sa lalaki ug nakaangkon usab og mga bun-og sa iyang kalawasan. – /RUB) (BANAT NEWS)
- Latest
