Snow Sheen gisakmit kay walay bayad-bayad og buhis

CEBU, Philippines – Ang tagdumala sa usa ka iladong kan-anan sa dakbayan sa Sugbo naghangyo karon nga tugotan sila nga malukat pagbalik ang ilang property nga giimbargo na sa siyudad tungod sa wala pagbayad og buhis.

Ang Cebu Snow Sheen Incorporated pinaagi sa iyang abogado nga si Bonifacio Degamo Jr. miangkon nga wala sila makabayad sa dul-an sa tunga sa milyon ka pesos nga buhis ngadto sa City Hall.

Si Atty. Degamo mipasabot nga dili nila tinuyoan ang nahitabo ug nahimo kini tungod kay gibulsa ra sa ilang bookkeeper ang kuwarta nga ila unta nga ibayad sa buhis.

Matud ni Degamo nga diha na sila makabantay nga wala diay kabayri ang ilang real property tax nga kantidad og P399 mil (building) ug laing P88 mil (machinery) diha nga wala na ang ilang bookkeeper.

Si Atty. Degamo miingon nga ang kanhi bookkeeper sa iyang kliyente wala usab mobayad sa ilang contribution alang sa SSS, Pag-IBIG, PhilHealth ug uban pa.

Ang Snow Sheen Restaurant nga nalakip sa gisubasta sa dakbayan tungod sa wala kabayri nga buhis mao ang nahimutang sa Capitol Site.

Malaumon ang abogado sa mao nga restaurant nga kahatagan sila og higayon nga malukat pagbalik sa iyang kliyente ang ilang balay-patigayon bisan og milapas na ang gilatid nga redemption period.

Base sa Local Government Code ang mga local government unit (LGU) gitugotan nga mo-subasta sa mga yuta, building ug mga makinarya kun ang ilang mga tag-iya mapakyas sa pagbayad sa ilang buhis sa taud-taod na nga katuigan.

Matud ni Atty. Degamo nga kun ang dakbayan nakahatag og konsiderasyon ngadto sa ubang tag-iya og properties nga gitugutang malukat nila pagbalik, sila angay usab nga hatagan niining mao nga prebiliheyo. (BANAT NEWS)