‘Safety and health’ ipaseguro sa mga contractors

CEBU, Philippines - Nanghinaut si Department of Labor and Employment-7 Director Exequiel Sarcauga nga motuman na unta ang mga kontraktor sa mga lagda labot sa mga infrastructure projects.

Kini naglakip sa safety and health sa mga empleyado ug pagwagtang sa mga eminent danger ilabi na nga risgo ang matang sa trabaho. Ang DOLE-7 niluwat na og 31 ka stoppage orders gikan sa buwan sa Enero karong tuiga. Matud ni Sarcauga nga si DOLE Secretary Rosalinda Baldoz nipagawas og marching order sa pagseguro nga naka-comply sa safety and health ang mga kontraktor pinaagi sa pag-umol og safety and health program ug pag-hire og safety officers ug uban pa.

Hinuon giingong duna gyu’y mga kontraktor nga gahi og ulo ug dili motahud sa mga lagda nga ila’ng gipatuman, butang nga gikasagmuyo gyud sa director.

Gitug-an hinuon ni Sarcauga ang ahensiya adunay giluwatang Joint Administrative Order-Memorandum of Agreement (JAO-MOA) tali sa Department of Trade and Industry, Department of Public Works and Highways, Professional Regulation Commission, Department of Interior and Local Government, ug Local Government Unit (LGUs) aron sa pag-monitor ug pag-regulate sa mga infrastructure projects aron maseguro ang kaluwasan sa mga trabahante niini. (Decemay P. Padilla/GMR)(BANAT NEWS)