_banat
^

11 anyos na-blackeye sa maestra

Jojo Ugdol ug Brenda D. Batuto (Banat) - November 17, 2015 - 9:00am

CEBU, Philippines – Maayong pagka black eye sa mata sa usa ka grade 4 pupil human kini gikatahong gihapak og jalousie blade nga kahoy sa iyang 25-anyos nga substitute teacher sa Langtad Elementary School diha sa lungsod sa Argao niadtong adlaw nga Lunes.

Ang hepe sa Argao Police nga si Senior Inspector Alejandro Batobalonos nga nahinabi sa Banat News miingon nga maayong pagkabun-og ug mipula ang tuong tabon-tabon sa mata sa 11-anyos nga batang lalaki human naigo sa jalousie blade.

Sumala pa ni Batobalonos nga sa iyang pagpangutana sa bata kini mitug-an nga nagtabi kini ug sa iyang classmate samtang nagklase. Matud pa nasuko ang ilang maestra (pangalan gipugngan una sa Banat News samtang wala pa makuhai og habig) ug gitawag siya niini apan sa paglingi niya kaniya gihapsan na siya niini sa kahoy nga jalousie blade.

Pasado alas 6 sa hapon sa adlaw nga Lunes mi-report sa kapulisan ang ginikanan sa bata ug gitambagan nga ipa-medical kini aron makapasaka og kaso batok sa maestra.

Apan kagahapon sa udto sa dihang mibalik sa buhatan sa kapulisan ang ginikanan sa bata kini miingon nga dili sila interesado nga mopasaka pa og kaso batok sa maestra kay matud pa nagkasinabot na sila sa buhatan sa prinsipal sa tunghaan.

Dako usab ang kahibulong ni Batobalonos nga mitug-an kaniya ang inahan sa bata nga lahi nga maestra ang nangayo og pasaylo sa ginikanan ug dili kadtong mihapak sa iyang anak.

Apan bisan pa man niini dili gihapon mopasaka og kaso ang inahan kay dili na daw kini gusto pa og gubot.

“Bisan giunsa namo og kombinsir di man gyud siya mo-file og kaso, natingala gani ko pag-ingon niya nga lahi nga maestra daw ang nangayo og pasaylo sa iyaha dili kadtong dalaga nga maestra (namunal),” matud pa ni Batobalonos.

Nasuta usab ni Batobalonos nga usa lang ka substitute teacher ang maong dalaga nga maestra, nga lumad nga taga lungsod sa Sogod.

Dili lang usab daw kini ang unang higayon nga adunay gipasakitan nga estudyante ang maong maestra apan wala lang nangreklamo ang mga biktima.

“Initon gyud daw ni og ulo si maam kay dili lang daw ni ang unang higayon nga naa’y gipasakitan niya diha, pero sa record namo sa Argao Police, kini pa ang una nga record niya,” dugang pa ni Batobalonos.

Kung mausab ang huna-huna sa ginikanan sa 11-anyos gipasalig ni Batobalonos nga andam sila nga mutabang sa pamilya sa pagpasaka og kaso batok sa dalagang maestra.

Samtang ang hepe sa Department of Education (DepEd) sa probinsiya mipahibalo nga adunay himuong imbestigasyon batok sa maong maestra.

Si DepEd Superintendent provincial division, Rhea Mar Angtud nagkanayon dili sila motugot nga adunay magtutudlo nga dagmalan ug dili nila kini duphan kun mamatud-ang sad-an.

Si Angtud nagkanayon nga gidili sa DepEd ang corporal punishment o pagpanakit isip pamaagi pagdisiplina sa estudyante.

Sa laing bahin, si Bise Gobernador Agnes Magpale, vice chairman sa Provincial Council for the Welfare of Children (PCWC) nagkanayon nga andam silang mutabang kung ang ginikanan sa bata moduol ngadto kanila. – /EIM) (BANAT NEWS)

ANG APAN ARGAO POLICE BANAT NEWS BATOBALONOS BISE GOBERNADOR AGNES MAGPALE DEPARTMENT OF EDUCATION DILI KINI MAESTRA NGA
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with