Hubog napunggit sa hepe naangol
CEBU, Philippines – Mga bun-og sa lawas ang naangkon sa usa ka lalaki nga hubog human kini nadasmagan sa motorsiklo nga gimaneho sa hepe sa kapulisan sa Dumanjug diha sa barangay Kanyuko,lungsod sa Dumanjug sa nakalabay nga gabii.
Ang biktima mao si Pablo Baybayanon, 55, nagpuyo sa maong dapit, samtang ang nakadasmag kaniya mao si Senior Inspector Arvi Arbuis, officer in-charge sa Dumanjug Police Station. Matud pa ni Police Officer 2 Ronilo Quirante, desk officer sa Dumanjug Police nga nahinabi sa Banat News, nag-roving si Arbuis sa maong dapit dihang nagsusapinday nga mitabok sa kalsada si Baybayanon.
Gumikan sa kakalit sa paglabang sa biktima wala na maka-brake pa ang opisyal ug nabanggaan kini hinungdan sa pagkalukot niini sa dalan samtang nilayat gikan sa motor si Arbuis.
Wa naunsa si Arbuis apan naguba ang side mirror sa motorsiklo niini. Hinuon nagkasinabot ra sab ang duha ka habig. Samtang sa lungsod sa Daanbantayan, patay ang usa ka guwardiya ug kritikal ang usa ka 22 anyos nga batan-ong hubog human nakasungag ang ilang gisakyang motorsiklo diha sa barangay Tapilon sa nakalabay’ng hapon.
Ang namatay mao si Virgillo Padilla, 38, guwardiya sa CTU sa Daanbantayan, samtang kritikal si Juvelito Santuele, 22, ang duha parehos nga nagpuyo sa susamang barangay.
Si Police Officer 3 Victor Avenido, imbestigador sa Daanbantayan Police nga nahinabi sa Banat News nagkanayon nga base sa nakuha nilang impormasyon kusog ang dagan ni Santuele ug mikawat kini sa lane nga gisubay ni Padilla hinungdan sa panagsungag sa ilang mga motor.
Dali pa unta nga gidala sa Daanbantayan District Hospital si Padilla apan nakabsan gayod kini sa kinabuhi, samtang si Santuele ang gidala sab dayon sa Vicente Sotto Memorial Medical Center (VSMMC) ug talandogon ang kahimtang.
Si Avenido mitug-an nga sa ilang gihimong dugang nga pakisusi nasayran nga pulos diay wala’y mga lisensya ang duha. – /EIM) (BANAT NEWS)
- Latest
