DENR nangandam sa El Niño

CEBU, Philippines – Hugot na nga gipangandaman sa Department of Environment and Natural Resources ang posible’ng epekto sa grabe’ng kainit sa panahon sama sa sunog sa kalasangan. Gibutyag ni DENR Regional Director Isabelo Montejo nga naka-alerto na ang ila’ng giumol nga Bantay Lasang Task Force.

Matud ni Montejo nga ang komunidad mao’y naglangkub sa task force ug nanghinaut siya nga malikayan ang susama’ng nahitabo sa nilabay nga tuig diin tungod sa kauga sa lasang dali’ng nikatap ang sunog tungod sa kainit sa panahon.

Giawhag ni Montejo ang katawhan nga dili magdaub ug dili magpataka og labay sa ila’ng upos sa sigarilyo sa higayun nga moadto sila sa lasang aron malikayan ang pagkasunog.

Samtang ang director sa Philippine Atmospheric, Geophysical Astronomical Services Administration, Oscar Tabada, niawhag sa mga Sugbuanon nga magpundo og tubig ilabi na karon nga aduna pa’y masinati nga uwan aron dili maglisud sa higayun nga masinati ang El Niño sa Sugbo. - /GMR) (BANAT NEWS)