Namusil nasikop

CEBU, Philippines – Tulo na ka suspetsado sa pagpamusil niadtong Biyernes sa tulo ka mga langyaw nga gikamatay sa usa ka German national sulod sa usa ka food chain sa Tabunok dakbayan sa Talisay ang nadakpan na sa kapolisan.

Nianang pagkagabii sa adlaw nga Biyernes, nadakpan sa Talisay City Police sa ilang hot pursuit operation ang usa ka Allan Velos, 40, nga taga San Isidro , Talisay City nga positibong gitudlo sa duha ka mga testigos.

Ang suspek kusganong mihimakak sa pasangil kay matud niya diha ra siya sa ilaha kauban sa iyang pamilya nga nangatulog. Usa ka kalibre 45 pistola ang nakuha gikan kaniya nga kusganon niyang gihimakak nga iyaha.

Niadtong pasado alas-4 sa kaadlawon sa adlaw nga Sabado nasikop usab sa kapulisan ang ikaduhang suspetsado nga si Ricci Ramirez, 21 nga taga Neighborhood, Barangay Tabunok dakbayan sa Talisay.

Ang mga sakop sa Regional Intelligence Division ug Regional Special Operations Group-7 maoy misikop ni Ramirez human sa nakuha nga impormasyon sa kapulisan. Samtang ang ikatulo nga suspek giingong nadakpan na sa Criminal Investigation and Detection Group-7 sumala pa sa mga report sa lokal nga sibyaanan.

Apan si Senior Superintendent Ritchie Posadas nga nahinabi sa Banat News ang mihangyo nga nagdumili pa paghatag og dugang impormasyon kay duna pay gipangita nga mga kauban niini.

Ang kapulisan wala pa ‘sab mitug-an kung apil ba gayud sa pagpamusil ang maong lalaki o unsa ang nahimong papel niini sa maong krimen.

Patay sa maong pagpamusil si Henry Haffner, 31, usa ka German national ug kasamtangan nga nagpuyo sa barangay Tisa dakbayan sa Sugbo samtang naangol sila si Julian Millard, 31, French national ug Cheten  Saparaiya, 32, Indian national nga pulos nagpuyo sa barangay Pooc dakbayan sa Talisay. – /EIM) (BANAT NEWS)