‘Treasure hunting’ sa Apas gipahunong

CEBU, Philippines - Miluwat og cease and desist order (CDO) ang Mines and Geosciences Bureau( MGB)-7  sa giingong treasure hunting sa Sitio Rotunda, Barangay Apas, sa dakbayan sa Sugbo. 

Ang CDO giluwatan sa MGB-7  batok nilang Matias ug Consuelo Densing human sa gihimong imbestigasyon sa MGB-7 niadtong Agosto 5 tungod sa  request sa mga opisyles sa maong barangay ug Banilad pagsusi sa gireklamong lugar.

Ang tigpamaba sa DENR-7 Eddie Llamedo mibutyag nga mipagawas sila og CDO  tungod kay walay permit gikan sa local government ang giingong  treasure hunting.

Sigon pa ni Llamedo nga delikado sa mga molupyo ug sa mga nagkawot ang ilang gihimo human nila masuta nga way mga timber support ang tunnel nga ilang gihimo.

Matud  ni Llamedo nga kun padayon sa ilang pagkawot sa tunnel ang pamilyang Densing, mahimo silang ipadakop sa  kapolisan. Gipahibawo ni  Llamedo nga  gikinahanglan nga molukat og permit diha sa ilang buhatan kun dunay ipahigayon nga  treasure hunting aron pagsiguro nga luwas ang ilang himuon nga pagkawot sa yuta. (BANAT NEWS)