Pari nag-sorry, banay di pa kadawat

CEBU, Philippines - Pari nga nangasaba ug mipakauwaw sa usa ka 17-anyos nga single mother nga nagpabunyag sa iyang anak nangayo og pasaylo pinaagi sa pagpadala og suwat ngadto sa pamilya sa dalagita.

Apan pamilya nga hingtungdan dili pa makadawat sa iyang pagbasol ug pagpangayo og pasaylo niining mga panahona tungod kay gisakitan sila sa gibuhat sa maong pari.

Si Fr. Romeo Obach, sakop sa Redemptorist Community nga mao ang pari nga nakita sa viral video nga mikatap sa social networking sites miangkon matud pa sa suwat sa iyang kasaypanan ug nangayo siya og pasaylo sa 17-anyos ug sa iyang pamilya.

Nauwawan

Ang matud pa pagpakauwaw nahitabo niadtong Domingo dihang nagpabunyag ang 17-anyos sa iyang anak nga kapin pa usa ka buwan.

Ang inahan sa maong 17-anyos nasagmuyo og maayo sa gibuhat ni Obach ug nahadlok siyang maapektahan unya ang pag-recover sa iyang anak nga padayon pa usab nga mibarog kay gibiyaan sa nakabuntis kaniya.

Mao usab ang kabalaka sa amahan sa batang inahan kinsa miingon nga maayo ang pagpangayo og pasaylo sa pari apan ang pagpasaylo naa sa iyang anak.

“Niagi baya ni og suicide attempt ang akong anak, dapat bantayunon iyang lihok hasta iyang pagtulog,” dugang pa sa amahan.

Matud pa sa inahan nga wala makatulog ang iyang anak human sa gibuhat sa pari niadtong adlaw’ng Domingo diha sa Sacred Heart Chapel siyudad sa Mandaue.

Nangayo og pasaylo

Sa opisyal nga pamahayag ni Fr. Obach siya mipadayag nga nagmahay siya og maayo nga iyaha kadtong nabuhat.

Gidawat ni Fr. Obach ang iyang kasaypanan ug nangayo siya’g pasaylo ilabi na sa batang inahan nga grabeng naapektuhan sa nahitabo.

Si Fr. Alfonso Suico Jr. media liaison sa Redemptorist community miingon nga dili nila tabunan ang nahitabo tungod kay sayod silang nasayop gyud kini sa iyang gibuhat.

Gipahibawo usab nila nga samtang nagpadayon ang ilang imbestigasyon di una makapahigayon og Santos nga Misa si Obach.

Apan bisan og nangayo na og pasaylo ang pari way plano ang hingtungdan nga makig-areglo, usa sa ilang nahuna-hunaan ang posibleng pagpasaka og kaso.

Di pa makapasaylo

Ang Banat News nakadawat og text message gikan sa 17- anyos nga dalagita nga miingon nga “pero para nako, dili pa ko-ka forgive sa pagkakaron gud…” Gihulagway sa 17-anyos nga inahan nga di makiangayon ang gibuhat ni Obach ngadto kanila ilabi na nga usa kini ka pari kay inay nga mohatag kini og tambag sa iyang kahimtang.

Matud sa 17- anyos, apil ang iyang anak  sa gipakauwawan sa pagsulti niini nga angayan kining itago tungod kay anak kini sa pagpakasala.

Samtang si Senior Inspector Marylou Cuizon sa Women’s and Children's Protection Desk sa PRO-7 miingon nga mahimo kaayong mopasaka og  kaso ang 17-anyos batok sa pari kun sa iyang tan-aw natumban niini ang iyang pagkatawo.

Ang mga kaso nga posibleng ipasaka nila mao ang “unjust vexation” ug “child abuse” tungod kay menor de edad man ang maong inahan nga gipakauwawan.

Nasayran si Fr. Romeo Obach lumad nga taga Iligan City, nagpangidaron na’g 59- anyos,  ug 28 na ka tuig sa pagkapari ug moduha na ka tuig nga nahimong chaplain  sa Sacred Heart Chapel.

Di manghilabot

Si Cebu Archbishop Jose Palma sa iyang bahin miingon nga dili diocesan ang pari nga nalambigit sa maong viral video , hatagan nila og panahon ang Redemptorist nga mohimo og ilang internal nga imbestigasyon.

Apan kun dunay pagduda, anha na mosulod ang Archdiocese sa maong kaso. Si Palma masaligon nga maayo ra ang dagan sa imbestigasyon ug wala na kinahanglana pa nila nga manghilabot.Hinuon natagbaw siya sa unod sa letter of apology ni Obach ug sa Redemptorist.

Si Palma sa iyang bahin miingon nga unta wala dayon gipakatap ang maong viral video ug gipaagi una sa proseso sama sa pagpa-barangay sa reklamo.  – /EIM (BANAT NEWS)