Lalaking gituohang nalumos padayong gipangita

CEBU, Philippines - Gipangita pa hangtud kagahapon sa hapon ang usa ka lalaki nga gituohang nalumos dihang naligo duol sa Cansaga Bridge sa lungsod sa Consolacion alas 7:00 pasado sa gabii sa milabay’ng Biyernes.

Si SPO1 Francisco Perez, Jr. sa Consolacion Police Station miila sa maong lalaki nga si Angelo Catandijan, 22-anyos, taga Sitio Kintolimbo, Barangay Jugan sa nahisgutang lungsod.

Ang mga barangay tanod sa maong dapit kinsa maoy unang nakatubag sa alarma ang mitaho ngadto sa kapolisan. Ang kapolisan mitabang usab kini og pangita kang Catandijan apan wala gyud nila kini makit-i.

Dugang ni Perez nga sayo kagahapon sa buntag uban gihapon sa mga tanod gipadayon nila og pangita si Catandijan apan hangtud sa pagsulat niining balita kagahapon sa hapon wala pa gihapon kini igkita. (BANAT NEWS)