Solo parents di pa kadawat og tabang

CEBU, Philippines - Wala gihapon aprobahi sa Cebu City Council ang gisugyot nga ordinansahon ni Konsehal Gerardo Carillo nga mopahatag og hinabang salapi ngadto sa mga “solo parents” nga ania magpuyo sa dakbayan.

Nahukman atol sa sesyon sa konseho kagahapon nga tukion pag-usab ang gisugyot nga ordinansahon ni Carillo unya sa sunod nga sesyon sa konseho aron maplantsa pag-ayo ang ubang     detalye.

Gusto ni Carillo nga pahatagan sa dakbayan og tag P5 mil nga cash assistance ang mata’g solo parent nga molupyo dinhi sa dakbayan sa Sugbo.

Pagka karon, kapin pa lang sa usa ka libo ka solo parents ang nagparehestro sa Department of Social Welfare and Services (DSWS) sa dakbayan ug mipahimulos og benepisyo.

Ang benepisyo nga ilang gipahimuslan mao ang huwam nga salapi alang sa ginagmay nila nga negosyo. Apan ang ubang mga konsehal nagtuo nga mosaka ang gidaghanon sa mga solo parents kun hingpit na nga aprobahan ang mao nga ordinansa.

Pipila ka konsehal mihimo’g sanglitanan sa ordinansa nga maghatag og cash assistance sa mga senior citizens. Kaniadto mauwaw ang mga tiguwang nga motug-an sa ilang edad apan karon gusto na nga magdali nga moabot sila sa 60.

Matud ni Carillo nga ang iyang ordinansa gisundog lang sa Republic Act 8972 kon Solo Parents’ Welfare Act nga ang kagamhanan motabang sa mga solo parents.

Gibutyag ni Carillo nga kadto’ng makapahimulos sa ordinansa mao lang ang mga solo parents nga dinhi sa dakbayan sa Sugbo mibotar sa tulo ka sunod-sunod nga eleksyon.

Apan tungod sa daghan nga pangutana gikan sa ubang konsehal, nahukman ni Vice Mayor Edgardo Labella nga unya na sa sunod Miyerkules tukion ang ordinansa kun angayan ba kini dayon nga aprobahan.

Ang ubang pangutana kun kinsa g’yud ang makapahimulos sa cash assistance. Ang solo parent mao kadtong mga babaye nga napaangkan ug wala minyoi sa amahan sa iyang anak.

Apan adunay uban nga nangutana kun maisip ba gihapon nga solo parent ang usa ka babaye nga wala makasal ug magpatuo nga nagbinugtong lang siya pag-atiman sa iyang anak apan diay gipuyo sa amahan sa bata.  (BANAT NEWS)