89 mil kilo nga hinabang giandam sa mga sundawo

CEBU, Philippines - Gipangunayan sa mga sakop sa 1st Tabak Division sa 1st Infantry Division nga nagbase sa Upper Pulacan, Labangan, Zamboanga del Sur ang pagdala sa 89 mil ka kilong hinabang sa  mga  biktima  sa bagyong  Yolanda.

Ang  maong  mga  hinabang  ilang  natigom pinaagi  sa ilang "Oplan Tabang Visayas" nga gilusad   didto sa ilang area of responsibilities.

Matud pa ni Col. Jose Randolf Seno Cruz ang G7/CMO Commander sa 1st Tabak Division nga siya uban sa 40  ka mga sundawo ang gitahasan ni Brig. Gen. Felicito Vergelio Trinidad Jr, ang DIVISION commander sa 1st Tabak Division   sa pagdala sa mga relief goods ngadto sa dakbayan sa Ormoc ug mga kasikbit nga kalungsoran  niini.

Ang mga relief goods gikan sa mga Local Government Units sa maong dapit, pribadong sector ug mga grupo nga miabag sa ilang duha ka semanang relief campaign nga  giulohan  og Oplan Tabang Visayas diin sila mismo ang nag-repack sa maong mga hinabang.

Ang 1st  Infantry Tabak Division maoy  mga sundalo nga nakiggubat sa mga sakop ni Nur Misuari   didto  sa  Zamboanga  sa milabay’ng bulan.

Human  matigum didto sa ilang kampo ang mga hinabang ila dayon kining gidala dinhi sa Sugbo luwan sa mga pribadong barko nga magbiyahi sa maong dapit. Lakip nga  gikargahan  mao  ang  5 ka 6x6 truck sa militar.

Kagahapon sa buntag   ang BRP Dagupan LC 551 barko  sa Phil. Navy napuno  sa mga sinakong hinabang gikan sa Zamboanga ug didto kini itugyan sa CMO sa 802nd Brigade nga nagbase sa Leyte.

Matud pa ni Col. Seno Cruz sila mismo ang mang apud-apod sa mga relief goods ngadto sa mga dapit nga  wala  kahatdi  og  hinabang  sa gobiyerno. Gibana-bana  nga  mokabat  sa  7, 058 ka pamilya ang makadawat sa maong hinabang  nga  naglakip  sa  pagkaon, gamit sa kusina, hygene kit, medisina ug mga used clothing. (Bong Soriano/WC)

 Pagtukod og  koral sa CPVDC gipahunong

Ang Office of the Building Officials (OBO) sa dakbayan sa Sugbo mipahunong sa pagtukod og koral sa Cebu Property Ventures and Development Corporation (CPVDC) sa dapit nga nahimutangan kaniadto sa Bagong Buhay Rehabilitation Center (BBRC) nga nakababag sa gimugna nga building nga iya sa Filinvest Land Incorporated (FLI).

Si Konsehal Allan Mahait sa Barangay Apas miingon nga wala nila hatagi ang CPVDC og clearance alang  sa   koral nga semento kay mireklamo ang kadagkoan sa FLI.

Ang reklamo sa kadagkoan sa FLI gihimo tungod kay ang koral nga semento nga gitukod sa CPVDC makabuwag man sa building sa FLI ngadto sa IT Park.

Apan bisan pa og ang kadagkoan sa CPVDC nakadawat na og Notice of Illegal Construction nga giisyu ni OBO Chief Kenneth Carmelita Enriquez nagpadayon gihapon sila pagtukod sa koral. Si Enriquez miingon nga giluwatan na gani nila og Second Notice of Violation ang CPVDC ug kun sa ikatulo nga pag-isyu dili gihapon sila motuman, pasakaan na gayud sila’g kaso sa hukmanan.

Ang lagda nga gilatid sa Presidential Decree 1096  o ang National Building Code of the Philippines  nga ang pagtukod og building, apil ang koral nga semento, kinahanglang lukatan gayud og permit gikan sa OBO. (BANAT NEWS)