Batan-on sa Ermita napusilan patay

CEBU, Philippines - Naghapla nga wala nay kinabuhi ang usa ka batan-on human kini pusila patay  sa may sitio Seaside,  barangay  Ermita proper, dakbayan sa Sugbo kagahapon sa alas 4:00 sa kaadlawon.

Ang biktima nailhan   nga  si  Kenneth Genesis Panis,16, giingong dili pa lang dugay nga nakagawas sa bilanggoan.

Sa pakighinabi ni SPO3 Rey Cuyos, imbestigador sa  Homicide Section sa Cebu City Police Office, nasayran  wala  hiilhi  ang  mipatay  sa biktima.

Wala  usa’y  mga  molupyo sa dapit  nga  namatyan  sa biktima  nga  mitug-an  sa  ngalan sa  kriminal. Pipila sa gipangutana  sa kapolisan miingon  nga  nakadungog lang  sila  og  mga  buto  sa armas ug ang  biktima  misyagit   og ‘Aray!’.

Sunod nga nakit-an sa mga molupyo sa maong dapit mao na ang naghapla   nga  biktima  nga wala  nay  kinabuhi. Sa kilid  sa biktima  napunitan  sa kapolisan  ang  kabhang  sa bala sa kalibre .45 ug ang cellphone niini nga naglutaw na sa sapa sa maong dapit.

Matud pa ni Cuyos nga usa sa ilang gisubay mao ang posibling pagkalambigit sa biktima sa kasong robbery  hinungdan sa pagkapriso niini.

Hinuon, sa pagkakaron blanko pa  ang kapolisan   bahin  sa nagpatay  ug  unsa  usab  ang   motibo niini.

Ang inahan sa biktima nga si Shiela, mipadayag  nga niadtong buwan sa Agosto sa miaging tuig, napriso ang iyang anak tungod sa pagkadala  niini  sa barkada.

Midugang  ang  inahan  nga hapit mag-usa ka tuig  nga  napriso   ang  biktima ug niadto  lang  Hulyo ning tuiga  kini nakagawas.

Gihulagway sa inahan sa biktima nga usa ka maayong tawo ang iyang anak ug wala siya’y nadunggan nga aduna kini kaaway.

Gani, tungod sa ilang kalisod, mitrabaho ang iyang anak sa Carbon Market isip helper aron lamang makatabang kanila.

Apan  nagmahay  ang  maong  inahan  sa dautang  barkada  sa iyang anak  nga  maoy  hinungdan  sa pagkat-on  niini  og binugoy. (BANAT NEWS)