22 nga missing gamay na lang og tsansang makita

CEBU, Philippines - Gamay na lang ang tsansa nga makit-an pa ang 22 ka mga lawas sa mga pasaherong naapil sa pagkalunod sa M/V St. Tomas Aquiñas tungod na sa kadelikado sa pag-dive sa ilawom sa tubig matud ni Armed Forces of the Philippines-Central Command commander, Major General Roy Deveraturda.

Si Deveraturda kansang hurisdiksyon nasakop lakip ang Naval Forces Central nga maoy nagpahigayon og search and retrieval operations uban sa mga sakop sa Coast Guard technical divers miingon nga ang mga debris sa barko, presensiya sa bunker oil ug kangitngit sa ilawom sa dagat maoy gimulo sa mga technical divers sa kadelikado sa operasyon.

Apan giklaro niya nga wala sila mawagtangi sa paglaum nga duna pay makit-an nga tripulante sa maong barko.

“Pinipilit nating maghanap kasi sa ganitong operation wala tayong deadline but somewhere along the way we have to decide na itigil ang isang activity na may futile attempt at kung i-siphon o i-salvage ang vessel maaaring may makita pa,” si Deveraturda nagkanayon.

Ang Naval Task Group nga gilangkuban sa Philippine Navy, Philippine National Police, Philippine Coast Guard ug mga civilian volunteers naka-standby lang gihapon.

“Madalang na lang ang retrieval operation hindi kagaya noon na every time they surface merong nakukuha,” si Deveraturda nagkanayon.

Sa miaging adlaw gidala na ni Chief Insp. Benjamin Lara, medico-legal-officer  sa  PNP Crime Laboratory-7, ang sobra sa 100 nga DNA samples ngadto sa Camp Crame alang sa test nga pagahimuon.

Nasuta usab gikan sa record sa Cosmopolitan Funeral Homes nga 62 na ka mga patay’ng lawas ang nauli na ngadto sa ilang mga lugar apan 22 pa ang missing.

Samtang dunay mga sugyot nga magtukod og usa ka apartment type nga temporary burial site alang niadtong mga wala pa gihapon mailhing mga naugkat nga patay’ng lawas. Ang maong sugyot tukion pa diha sa Cebu City Hall. (BANAT NEWS)