Baybayon puno sa nangaligo

CEBU, Philippines - Sama sa naandan matag tuig sa pasko sa pagkabanhaw ang mga kabaybayonan mapuno kini sa mga mangaligo sa dagat.

Kagahapon sa alas 6:00 sa buntag ang Larawan beach sa barangay Poblacion, dakbayan sa Talisay napuno na kini sa mga tawo nga mangaligo sa dagat.

Kasagaran sa mga nangaligo taga dakbayan sa Sugbo ug usa sa nakit-an kagahapon si S/Supt. Audie Villacin uban sa iyang pamilya ug mga higala.

Si Villacin kinsa taga dakbayan sa Sugbo nahimong hepe kaniadto sa Talisay City Police Station ug naa na karon madestino sa Police Regional Office (PRO)-7.

Si Villacin mibutyag sa Banat News kagahapon nga kaniadto sa mga tuig 1970’s uban sa iyang mga higalang mga bata mosuroy gyud sila diha sa Larawan beach ug mangaligo sa dagat.

Niadtong higayona nagpanuigon pa lang sila kaniadto og 7,8 ug 9-anyos.

Matud niya nga kung ikompara kaniadto matag Easter Sunday diyotay lang ang mga mangaligo apan karon ang Larawan beach napuno kini sa mga mangaligo.

Ug usa sa iyang nabantayan nga dunay mga lifeguard ang naglantaw diha sa dagat nga maoy moluwas kung ugaling dunay malumos.

Si Villacin midugang nga ang iyang pagsuroy diha sa Larawan beach uban sa iyang pamilya ug mga higala mao ang paghandom niya sa kaniadto dihang bataa pa siya.

Sa laing bahin, dili malikayan nga dunay mga magpabadlong ilabi na kadtong mga nakainom na hinuon dunay mga polis nga gidestinong nagsuroys-suroy diha sa kabaybayonan sa siyudad.

Gawas sa mga polis dunay mga sakop usab sa Talisay Rescue Emergency Action Team (TREAT) ang nag-estambay diha sa kabaybayonan.

Sa laing bahin, si Alfie Fernandez kinsa usa sa mga lifeguard nagkanayon nga usa ka 13-anyos nga batang lalaki nga si Clifford Badayos ang deriyot malumos diha sa Larawan beach dihang nakabuhi kini sa salbabidang iyang giabayan apan dali nila kini og luwas ug sa mga kauban niini. (Brenda D. Batuto) (BANAT NEWS)