Mga trabahante sa DSWD gibansay

CEBU, Philippines - Dul-an sa 100 ka bag-ong trabahante ang misalmot sa tulo ka adlaw nga pagbansay-bansay alang sa espesyal nga inihapay sa kabalayan sa Central Visayas nga naapektohan sa bagyong "Pablo" niadtong miaging Disyembre sa miaging tuig.

Matud pa ni Kerwin Macopia, Administrative Officer V sa Department of Social Welfare and Development (DSWD-7) nga ubos sa programang National Household Targeting System for Poverty Reduction (NHTS-PR), nga kining  maong  departamento  sa DSWD  maoy mipahigayon og usa ka espesyal nga pagbansay-bansay didto sa syudad sa Dumaguete ning bag-ohay lang.       Gipadayag ni Macopia nga tumong sa maong pagbansay-bansay nga masabtan ug mapausbaw ang kamahinungdanon sa programang NHTS-PR ug lakip na ang espesyal nga balidasyon alang sa bag-ong napili nga field staff. Dugang pa ni Macopia nga gitug-an usab sa maong training ang kalabot sa papel ug mga trabahuonon sa mga nagkalain-laing staff sa aktwal na unya nga pagpahigayon sa household assessment diin adunay duha ka area coordinators, 13 ka  area supervisors ug 78 ka mga enumerators gikan sa tibook rehiyon sa Central Visayas ang misalmot sa maong workshop.     

Sumala pa usab ni Teresita Garcia, NHTS-PR National Deputy Project Manager kinsa usa sa mga mamumulong sa maong pagbansay-bansay nga ang maong training mipaambit sa nagkalain-laing pamaagi kung unsaon paghupot og tarong ang household assessment sama sa hustong  pagsul-ob  og  senina, hustong  komunikasyon, hustong solusyon  sa   komplikadong sitwasyon sa panarbaho.     

Gitudlo  ang  hustong  paagi  sa pagsulod  sa usa  ka balay  nga  kuhaan  og  mga  kasayoran  bahin  sa kahimtang  sa  pagpuyo  ug  sa panginabuhi  sa tagbalay.      Sa laing bahin gipasabot usab ni Regional Field Coordinator (RFC) Ruben Boybanting ngadto sa mga field staff ang kalabot sa mga paagi kung unsaon nga makab-ot ang kalamposan sa Household Needs Assessment Form (HNAF) diin naglangkob kini sa mga impormasyon sa kabalayan, kahimsog sa panglawas ug kalimpyo, pagkaon, ug usab ang kahimtang sa panimalay lakip na ang plantilya sa maong panimalay nga gipahigayonan og ebalwasyon.    (BANAT NEWS)