Rapist nisibat padung Manila, sikop

CEBU, Philippines — Habal-habal driver nga nilugos sa 11-anyos nga silingan nisibat padung sa Manila, apan nadakpan gihapon didto palang sa pantalan. Ang nakadako kaniya mao ang mga sakop sa Guadalupe Police Station 9 Cebu City Police Office pinaagi sa abag sa Criminal Investigation and Detection Group(CIDG) National Capital Region, SWAT Police Station 12, Manila Police District, Coast Guard North Harbor, Sea Marshal Unit sa barkong iyang gisakyan.

Ang  suspek nga si alyas Andot, 37 anyos usa ka habal-habal driver maoy gitumbok nga nilugos sa dalagita  sa usa sa mga  barangay  sa siyudad sa Sugbo.  Ang inahan sa biktima  nitug-an sa kapolisan nga Marso 7, 2026, Sabado sa buntag nilaag ang iyahang anak.  Nahibulong kini kay wala mouli pagka udto.

Pasado alas 3 sa hapon anang adlawa niuli ang iyahang anak, naghilak apan wala mangutana ang inahan sa pagtuo nga nag-away ra kini sa iyahang nga amiga.

Apan nahibulong na ang inahan nga ang biktima nagsige og balik-balik sa CR, katulo ka higayon hinungdan nga iyaha kining gipanid-an hangtud nga sa pagsige niya og sukit-sukit nitug-an kinin  nga gilugos siya sa suspek sa awaaw nga dapit. Matud ni Police Colonel George Ylanan, OIC City Director sa Cebu City Police Office nga ang Guadalupe Police Station 9 niadto dayon sa gipuy-an sa suspect apan wala na kini didto. Apan nitug-anan sila sa inahan sa suspek nga nilarga kini padulong sa Alegria apan nisakay diay ni og barko padung sa Bacolod City ug didto sab nisakay og barko paingon sa kaulohan.

Ang mga operatiba nibalik sa agi ug nisakay og eroplano padung sa Manila ug nagpatabang sa mga law enforcement units didto aron pagsikop sa suspek.

Nagpasalamat si Ylanan kang Cebu City Mayor Nestor Archival kinsa mitabang nila aron madakpan gyud dayun ang suspek.  Si Police Lieutenant Colonel Franco Rudolf Oriol - Deputy City Director for Operation ug tigpamaba sa CCPO miingon nga gihaylo sa suspek ang biktima, gipasakay sa motorsiklo ug gidala dayon sa mingaw nga dapit ug didto gihimo ang krimen.  Ang suspetsado nagdumili pagtingog ug igo ra naglingo-lingo sa dihang gipangutana sa media. Si Archival sa iyang habig miingon nga wala'y luna ang mga kriminal sa siyudad sa Sugbo. – IBM BANAT NEWS