Curfew ordinance gihugtan sa lungsod sa Liloan

CEBU, Philippines — Higpit nga gipatuman karon sa kapolisan sa Lungsod sa Liloan ang Curfew Ordinance alang sa mga minor de edad nga molopyo sa kabarangayan.

Nonot sa paghingusog sa ordinansa gihimo sa matag alas 9:30 sa gabii ang pagpatingog sa siren nga nagpaalarma sa mga ginikanan sa paghipos na sa ilang minor de edad nga mga anak tungod kay alas 10 ang takna sa gabii ang oras sa pagsugod curfew sa mga minor de edad. Niadtong Biyernes, Pebrero 20 sa alas 9:30 sa gabii unang nabati ang pagtingog sa siren sa pagpaalarma sa mga minor de edad sa pagsulod na sa ilang panimalay.

Si Liloan Mayor Aljew Frasco, mipasabot nga ilang gihingusgan sa pagpatuman ang Curfew Ordinance sa mga minor de edad sa paghatag sa ilang kasiguroan nga malikay nga mahimong biktima sa mga dautang elemento nga maglaroylaroy sa panahon nga lawom na ang kagabhion.

Ang team sa kapolisan nga gipangulohan sa ilang hepe nga si Police Lieutenant Colonel Dindo Juanito Alaras nga mihimo sa ilang operasyon sa Barangay Bajac, Poblacion, Sambag ug San Vicente maoy ilang na-rescue ang lima ka mga minor de edad.

Base sa Ordinansa sa unang kalapasan kini nagmando sa pagtanom og napulo ka mga fruit bearing trees ug sa P500 nga multa sa ginikanan o guardian, ikatulo nga kalapasan mokabat sa P1,500 ang multa ug motambong half day nga seminar ug ikaupat P2,000 nga multa o napulo ka adlaw nga pagkabalhog sa bilanggoan. — /MEL (BANAT NEWS)